İranda 24 saat Azərbaycan dilində yayımlanacaq televiziya kanalı açılacaq
Bakı, 14 oktyabr (AZƏRTAC). İranda 24 saat Azərbaycan dilində yayımlanacaq televiziya kanalı açılacaq. Bu kanalda seriallar, cizgi filmləri, sənədli filmlər, həmçinin Azərbaycanla İran arasında münasibətlər, xüsusilə mədəni sahədə əlaqələrlə bağlı müxtəlif verilişlər yayımlanacaq. AZƏRTAC xəbər verir ki, bu sözləri Azərbaycanda səfərdə olan İran İslam Respublikasının Radio-Televiziya Təşkilatının sədri İzzətullah Zərqami oktyabrın 14-də keçirdiyi mətbuat konfransında deyib. İ.Zərqami bildirib ki, həmin televiziya kanalında Azərbaycanda istehsal olunan filmlər də nümayiş olunacaq.
O vurğulayıb ki, bu televiziya kanalının açılması ölkələrimiz arasında mədəni əlaqələrin güclənməsinə xidmət edəcək.
İ.Zərqami qeyd edib ki, İran “Azərspace-1” peykinin imkanlarından yararlanmaq niyyətindədir. Belə ki, İran “Azərspace-1” vasitəsilə 12 televiziya və radio kanalının yayımlanmasını nəzərdə tutur.
İran Radio-Televiziya Təşkilatının sədri Azərbaycana səfəri çərçivəsində keçirdiyi görüşlərdə ölkələrimiz arasında teleradio yayımının təşkili, gələcəkdə hər iki ölkənin tarixi, mədəniyyəti ilə bağlı filmlərin hazırlanması məsələsinə dair səmərəli müzakirələrin aparıldığını da diqqətə çatdırıb.
Bölmənin digər xəbərləri
