“İRƏLİ” İctimai Birliyi ötən ilə çoxşaxəli layihələrin həyata keçirilməsi ilə yekun vurub
Bakı, 6 yanvar, AZƏRTAC
Ötən il ərzində “İRƏLİ” İctimai Birliyi gənclərin milli-mənəvi dəyərlərə bağlı, sosial cəhətdən fəal, müasir bilik və bacarıqlara malik vətəndaşlar kimi formalaşmasına yönəlmiş genişmiqyaslı layihə və təşəbbüslərin icrasını davam etdirib.
Bu barədə “İRƏLİ” İctimai Birliyinin sədri Şahin Rəhmanlı AZƏRTAC-a açıqlamasında bildirib.
Onun verdiyi məlumata görə, il ərzində milli dəyərlərin təbliği, vətənpərvərlik tərbiyəsi, təhsil və məşğulluq, rəqəmsallaşma, süni zəka, ətraf mühitin qorunması, qeyri-formal təhsil, könüllülük və sağlam həyat tərzi istiqamətlərində onlarla layihə və tədbir həyata keçirilib. Həmin müddət ərzində 7 düşərgə, 5 layihə, 24 tədbir, 74 təlim, 31 görüş, 12 ekskursiya, 6 ətraf mühitin qorunması üzrə aksiya təşkil olunub, eləcə də 8 beynəlxalq layihədə gənclərin iştirakçılığı təmin edilib.
Həmçinin irihəcmli layihələrdən biri olan “Gənclərin Peşə Bələdçisi” proqramı Elm və Təhsil Nazirliyinin dəstəyi, Lənkəran Dövlət Peşə Təhsil Mərkəzinin tərəfdaşlığı ilə həyata keçirilib və proqram çərçivəsində ölkənin 17 regionunda 3 min 700-dən çox gənc peşə təhsilinin əhəmiyyəti, əmək bazarının tələbləri və karyera imkanları barədə məlumatlandırılıb. Layihənin icrası üçün 24 peşə bələdçisi hazırlanaraq prosesə cəlb edilib. QHT-lərə Dövlət Dəstəyi Agentliyinin dəstəyi ilə həyata keçirilən “Ecoinnovators: Gənclər üçün ekoloji texnologiyalar və sosial sahibkarlıq düşərgəsi” layihəsi də genişmiqyaslı və innovativ layihələrdən biri olub. Layihə çərçivəsində 500-dən çox gəncin maarifləndirilməsi, 10-a yaxın texnoloji və sosial sahibkarlıq təşəbbüslərinin formalaşmasına nail olunub.
Bundan başqa, rəqəmsal transformasiya və süni zəka texnologiyalarının sürətli inkişafı nəzərə alınaraq gənclərin bu sahədə düzgün və faydalı istifadəsini təşviq edən “The Art of Prompt Engineering with ChatGPT” kitabı Azərbaycan dilinə tərcümə edilərək gənclərin istifadəsinə təqdim olunub. Həmin təşəbbüs gənclərin rəqəmsal savadlılığının və innovativ düşünmə bacarıqlarının artırılmasına xidmət edir.
Şahin Rəhmanlı deyib ki, il ərzində təşkilat tərəfindən iki dəfə təcrübə proqramı həyata keçirilib və həmin proqramlar vasitəsilə 25 gəncin bilik və bacarıqları təkmilləşdirilib. Eyni zamanda, ali təhsil müəssisələri tərəfindən təcrübəyə göndərilən 20 gənc təşkilatın fəaliyyətlərinə cəlb olunaraq praktiki fəaliyyətə cəlb edilib. Eyni zamanda, 45 gənc könüllü il ərzində “İRƏLİ” İctimai Birliyinin keçirdiyi tədbirlərin təşkilində fəal iştirak edib və layihələrin əsas hərəkətverici qüvvəsinə çevrilib. Həmçinin gənclərimizin beynəlxalq layihələrdə iştirakçılığı dəstəklənib, 14 gənc 8 ölkədə keçirilən müxtəlif layihələrə göndərilib. Təşkilatın fəaliyyətlərində dayanıqlı inkişaf məqsədləri, ekoloji maarifləndirmə də xüsusi yer tutub. Gənclər düşərgələri, ictimai müzakirələr, gənc iqlim elçiləri ilə görüşlər, mədəniyyət sahəsində gənclərin dəstəklənməsi, gənclərin fiziki hazırlığı və maarifləndirici sessiyalar 5 min 579-dan çox gəncin iştirakçılığına şərait yaradılıb.
İctimai Birliyin sədri gənclərin məlumatlandırılması və dəstəklənməsi üzrə fəaliyyətin bu il də davam etdiriləcəyini bildirib. “Bu məqsədlə müxtəlif qurumlarla əməkdaşlıq çərçivəsində BMT-nin Davamlı İnkişaf Məqsədləri üzrə maarifləndirmə, məktəblilərin oxu savadlılığının dəstəklənməsi, Qərbi Azərbaycana qayıdış və “Böyük Qayıdış” prosesində gənclərin rolunun artırılması istiqamətində təşəbbüslərin təşkili, gənclərin rəqəmsal savadlılığının artırılması, ətraf mühit, mədəniyyət, gənclərin asudə vaxtının səmərəli təşkili, “Şəhərsalma və Memarlıq İli” çərçivəsində fəaliyyətlərin təşkili həyata keçiriləcək. Gənclərə yaradılan imkanlar ölkənin gələcəyinə yatırılan ən dəyərli sərmayədir. Ona görə də daim gənclərin inkişafı üçün çalışacaq, dövlətin yaratdığı imkanlardan faydalanmaları üçün onları dəstəkləyəcəyik”, - deyə o diqqətə çatdırıb.
Bölmənin digər xəbərləri
