“İrəli” İctimai Birliyi “Rəqəmsal ay” kampaniyasına start verib
Bakı, 26 mart, AZƏRTAC
“İrəli” İctimai Birliyi gənclərin asudə vaxtının səmərəli təşkili, onların pandemiya şəraitində müxtəlif istiqamətlər üzrə maarifləndirilməsi və rəqəmsal dünyanın təklif etdiyi yeni imkanların dəyərləndirilməsi məqsədilə ötən il olduğu kimi, bu il də martın 25-dən aprelin 25-dək olan dövrü “Rəqəmsal ay” (All Digital Month) elan edib.
İctimai Birlikdən AZƏRTAC-a bildiriblər ki, “Rəqəmsal ay” təşəbbüsünün iştirakçıları qarşıdakı bir ay ərzində peşəkar təlimçilər tərəfindən onlayn formatda keçiriləcək maarifləndirici və əyləncəli təlim, vebinar, görüş və intellektual oyunlarda iştirak edəcəklər. Bu tədbirlər gənclərlə işin təşkili, beynəlxalq layihələrdə iştirak, karyera planlaması, xaricdə təhsil, media savadlılığı - “fake” xəbərlərlə mübarizə, hüquq, CV və motivasiya məktublarının yazılması, internet təhlükəsizliyi, sosial şəbəkələrdən səmərəli istifadə qaydaları, bədən dili, psixologiya, tənqidi düşüncə və digər mövzular təşkil ediləcək.
Hər bir tədbir barədə “İrəli” İctimai Birliyinin sosial media hesablarında əvvəlcədən məlumat veriləcək.
Bölmənin digər xəbərləri
