İSESKO gənclərin ekstremizmdən qorunması üzrə fəaliyyətini gücləndirəcək
Qahirə, 5 mart, AZƏRTAC
İslam Dünyası Təhsil, Elm və Mədəniyyət Təşkilatı (İSESKO) İslam aləmində gənclərin ekstremizmdən qorunması üzrə öz fəaliyyətini genişləndirəcək proqram hazırlayıb. Bu çərçivədə təşkilatın baş direktoru Salim Əl-Malik Mərakeş Krallığının Məhəmmədiyyə İlahiyyatçılar Liqasının baş katibi Əhməd Abbadi ilə əməkdaşlığa dair müqavilə imzalayıb.
AZƏRTAC xəbər verir ki, imzalanma mərasimində çıxış edən İSESKO-nun baş direktoru gənclərin ekstremizmdən qorunmasında ilahiyyatçıların üzərinə böyük vəzifələr düşdüyünü vurğulayıb. Onun sözlərinə görə, bu məqsədlə xüsusi nəşrlər hazırlanacaq, təlim kursları və konfranslar təşkil ediləcək. Gənc nəslin ekstremist ideologiyasından qorunması sahəsində ilahiyyatçıların və humanitar, sosial elmlər üzrə alimlərin birgə fəaliyyəti də mühüm amildir.
Proqram çərçivəsində imzalanmış sənəddə altı layihənin həyata keçirilməsi nəzərdə tutulur. İSESKO baş direktorunun müşaviri Əbdelilah Benarafa jurnalistlərə müsahibəsində bildirib ki, layihələrin həyata keçirilməsinə İslam aləmindən bir çox tanınmış alimlərin cəlb edilməsi, gənclərlə açıq diskussiyaların təşkili, onların arzularının öyrənilməsi, universitetlərin və tədqiqat mərkəzlərinin bu prosesdə fəal iştirakı təmin olunacaq.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
