AZƏRTAC-ın xüsusi müxbiri Madriddə nəşr olan gündəlik “El Pais” qəzetinə istinadən xəbər verir ki, İspaniya şagirdlərinin əksəriyyətinin bilik səviyyəsi çox aşağıdır. Onlar hətta çox asan bir suala cavab verməkdə belə çətinlik çəkirlər. Əsas ofisi Parisdə yerləşən İqtisadi İnkişaf və Əməkdaşlıq Təşkilatının (OSDE) Madrid məktəbləri arasında apardığı tədqiqat vəziyyətin acınacaqlı olduğunu sübut etmişdir. Təşkilat paytaxtın müxtəlif məktəblərində 11-12 yaşlı şagirdlərə “Jül Vern yüz il bundan əvvəl dünyasını dəyişmişdir. O, neçənci ildə vəfat etmişdir” sualı ilə müraciət etmişdir. Şagirdlərin yarısı bu sadə suala cavab verməkdə çətinlik çəkmişdir.
Qəzetin yazdığına görə, bu vəziyyət heç kimi təəccübləndirməməlidir. Çünki son illər ölkədə təhsilin səviyyəsi çox aşağı düşmüşdür. Təşkilatın apardığı tədqiqatın nəticələrinə görə, ölkədəki gənclərin 33 faizinin bilik səviyyəsi aşağı olduğundan, onlar hətta bakalavr dərəcəsini belə keçə bilmir. Hökumət qonşu dövlətlərlə müqayisədə təhsilə çox az vəsait ayırır.
Madrid məktəblərində şagirdlərin riyaziyyat fənnindən bilikləri daha acınacaqlıdır.
