İsrail əhalisinin yarıdan çoxu koronavirusa qarşı peyvənd olunub

08.02.2021 [12:27]
Çap et
A⁺ A^-

Bakı, 8 fevral, AZƏRTAC

İsrail dünyada əhalisinin yarıdan çoxunun koronavirusa qarşı peyvənd olunduğu ilk ölkədir.

AZƏRTAC TASS agentliyinə istinadla xəbər verir ki, 8,9 milyon əhalisi olan İsrail dövlətində 5,54 milyon nəfər, yaxud əhalinin 62,4 faizi peyvənd edilib.

Beləliklə, İsrail vaksinasiya edilənlərin əhali sayı ilə nisbətdə payına görə dünyada liderlik edir. Bu göstərici üzrə ikinci yeri Birləşmiş Ərəb Əmirlikləri (44,79 faiz), üçüncü yeri Seyşel Adaları (40,49 faiz) tutur. Böyük Britaniyada əhalinin 18,95 faizi, ABŞ-da 12,84 faizi peyvənd olunub.

Vaksinasiya edilənlərin miqdarına gəlincə, hazırda liderlik Birləşmiş Ştatlara məxsusdur - 42 milyon nəfər. İkinci yerdə Çin (31,2 milyon nəfər), üçüncü yerdə isə Böyük Britaniya (12,6 milyon nəfər) gedir.

TASS agentliyinin hesablamasına görə, dünyada 131,9 milyon nəfər və ya planet əhalisinin 1,7 faizi peyvəndlənib.