İstanbulda “Trend” BİA və DHA-nın birgə layihəsinin təqdimatı olub
İstanbul, 13 oktyabr, AZƏRTAC
Azərbaycanın “Trend” Beynəlxalq İnformasiya Agentliyi (BİA) ilə Türkiyənin nüfuzlu media qurumu “Demirören” İnformasiya Agentliyinin (DHA) birgə layihəsi çərçivəsində İstanbulda "www.dhapress.com"un təqdimatı olub.
AZƏRTAC xəbər verir ki, bu məqsədlə Medianın İnkişafı Agentliyinin icraçı direktoru Əhməd İsmayılov, Audiovizual Şuranın sədri İsmət Səttarov, Mətbuat Şurasının sədri Rəşad Məcid, “Trend” BİA-nın baş direktoru İlqar Hüseynov, Milli Məclisin deputatı Sevil Mikayılova, “Trend”in baş direktorunun müavini, “Türk Dünyası” (Turkic.World) media platformasının rəhbəri Rufiz Hafizoğlu, şirkətin baş redaktoru Emin Əliyev, “Trend” BİA-nın kommersiya üzrə direktoru Sənan Hüseynov və digərlərindən ibarət Azərbaycanın nümayəndə heyətinin Türkiyəyə səfəri olub.
“Demirören” İnformasiya Agentliyinin (DHA) baş direktoru Celal Korkutun ev sahibliyi ilə keçirilən təqdimat mərasimində Azərbaycanın İstanbuldakı baş konsulu Nərminə Mustafayeva, konsulluğumuzun əməkdaşları, eləcə də Avropa Xəbər Agentlikləri Alyansının Baş katibi Aleksandru Gibou və digərləri iştirak ediblər.
Tədbirdə çıxış edən Nərminə Mustafayeva, Celal Korkut, Əhməd İsmayılov, İsmət Səttarov, Rəşad Məcid, Aleksandru Gibou, Sevil Mikayılova Azərbaycan mediasının son dövrlər sürətli inkişafı, iki qardaş ölkə arasında belə bir platformanın yaradılmasının əhəmiyyəti, saxta xəbərlərə qarşı birgə mübarizə, 44 günlük Vətən müharibəsi dövründə Türkiyə mediasının daim Azərbaycanın yanında olması, ölkəmizin haqq səsinin dünyaya çatdırılması və dezinformasiya ilə mübarizədə birgə fəaliyyət, bu əməkdaşlığın dövlət başçılarımızın imzaladığı Şuşa Bəyannaməsi ilə ən yüksək səviyyəyə yüksəldilməsindən danışıb, birgə media platformasının yaradılmasının təkcə Türkiyə və Azərbaycanın deyil, bütün Türk dünyasının səsinin beynəlxalq aləmə çatdırılmasında mühüm rol oynayacağını vurğulayıblar.
Sonra Azərbaycan nümayəndə heyəti DHA-nın peşə məktəbi və “Demirören” Media Holdinqinin televiziya studiyaları ilə tanış olub.
Xatırladaq ki, Azərbaycan və Türkiyənin ilk ortaq media platforması olan “www.dhapress.com”un ilk təqdimatı Şuşa Qlobal Media Forumu çərçivəsində baş tutub.
Bölmənin digər xəbərləri
