İstanbulun Boğaziçi Universitetində icazəsiz aksiyalar zamanı saxlanılanların 498-i sərbəst buraxılıb

04.02.2021 [15:19]
Çap et
A⁺ A^-

İstanbul, 4 fevral, AZƏRTAC

İstanbulun Boğaziçi Universitetində keçirilən icazəsiz aksiyalar zamanı ümumilikdə 528 nəfər saxlanılıb. Onlardan ikisi həbs edilib, 108-i şərti olmaqla, ümumilikdə 498-i sərbəst buraxılıb.

AZƏRTAC xəbər verir ki, bu barədə Türkiyənin daxili işlər nazirinin müavini İsmail Çataklı mətbuat nümayəndələri üçün brifinqdə deyib.

Nazir müavini, eyni zamanda, yanvar ayı ərzində ölkə daxilində təhlükəsizlik tədbirləri çərçivəsində keçirilən əməliyyatlar zamanı 73 terrorçunun ələ keçirildiyini deyib.

Qeyd edək ki, Boğaziçi Universitetindəki hadisələr yanvarın 2-də professor Melih Bulunun rektor təyin edilməsinə etiraz olaraq başlayıb. Universitetdə son hadisələr isə Müqəddəs Kəbənin fotoşəkillərinin ali təhsil müəssisəsinin həyətində yerdə nümayiş etdirilməsi ilə bağlıdır. Etirazlar zamanı saxlanılanların böyük əksəriyyətinin Boğaziçi Universiteti ilə əlaqəsinin olmadığı, bəzilərinin isə terror qruplaşmalarına üzv olduqları müəyyən edilib.

Günel Məlikova

AZƏRTAC-ın xüsusi müxbiri

İstanbul