İsveç Baş nazirinin xanımına müsabiqədənkənar ruhani vəzifəsi verilib
Stokholm, 6 iyul, AZƏRTAC
İsveç Baş nazirinin xanımı Birqitta Ed ictimai diskussiyaların mərkəzində yer alıb. Bu, Strenqnes kafedral kilsəsində ona açıq müsabiqə olmadan ruhani vəzifəsinin verilməsindən sonra baş verib.
AZƏRTAC xəbər verir ki, yeni ruhani vəzifəsinin təsis edilməsi qərarı 2023-cü ilin oktyabrında qəbul olunub və artıq bir gün sonra Ed müvafiq müraciət göndərib. Vakansiya barədə informasiya dərc olunmayıb və Baş nazirin xanımı həmin vəzifəyə yeganə namizəd olub. Birqitta Ed müraciət etdiyi zaman pastor köməkçisi kimi məcburi xidmət müddətini hələ başa vurmasa da, kilsə rəhbərliyi onun təyinatının uyğun hesab edib və sonradan bu vəzifəyə təsdiqləyib.
Kilsə rəhbərliyi müəyyən edilmiş qaydalara uyğun hərəkət etdiyini və namizəd tələblərə tam cavab verdiyi üçün vakansiya elan etməkdən çəkindiyini bildirib. Həmçinin qeyd edilir ki, qanuni olaraq müsabiqə elan etmək tələb olunmasa da, belə bir təcrübə adi hal hesab olunur və vəzifəyə qəbul prosesinin şəffaflığına töhfə verir.
Yaranmış vəziyyət bir sıra ekspertlərin tənqidinə səbəb olub. Lund Universitetinin etika üzrə dosenti Elizabet Qerle hesab edir ki, hətta Baş nazirin həyat yoldaşına imtiyazların verilməsi ilə bağlı şübhələr də İsveç kilsəsinə olan etimada mənfi təsir göstərə bilər. Bir neçə kilsə rəhbərinin Europaskolan özəl məktəbi və Birqitta Ed tərəfindən təsis edilən “Fållöknastiftelsen” fondu ilə əlaqələri ilə bağlı əlavə suallar yaranır.
“Kiminsə birdən çox vəzifə tutması həmişə şəxsi və ictimai maraqları qarışdırmağa başlamaq riski yaradır. Bu, şəxsin öz dost dairəsinin üzvlərinə və artıq müxtəlif direktorlar şuralarında birlikdə çalışdığı insanlara üstünlük verilməsi, qohumbazlıq şübhələri üçün əsas yaradır. Bu, heç də yaxşı hal deyil”, - deyə E. Qerle vurğulayıb.
Jurnalist araşdırmasının dərc olunmasından sonra Strenqnes yeparxiyasına şikayətlər daxil olub və Birqitta Edin ruhanilik tələblərinə uyğunluğunu qiymətləndirmək üçün araşdırma başladılıb. Yepiskop Yuhan Dalman və kilsənin rəhbəri Kristofer Lundqren potensial maraq toqquşması səbəbindən namizədliklərini geri götürüblər və araşdırmada iştirak etmirlər.
Birqitta Ed isə yaranmış vəziyyətlə bağlı açıqlama verməyib.
Bölmənin digər xəbərləri
