İsveç hökuməti ən böyük islahatlar paketini təqdim edəcək
Stokholm, 29 avqust, Nərgiz Cəfərli, AZƏRTAC
İsveç hökuməti bu il islahatlar üçün rekord həcmdə - 80 milyard kron (7,4 milyard dollar) məbləğində büdcə təqdim edəcək.
AZƏRTAC xəbər verir ki, bu, pandemiya illəri istisna olmaqla, ölkə tarixində ən böyük məbləğdir.
Maliyyə naziri Elizsabet Svantesson büdcənin böyük olmasını tənəzzül şəraitində iqtisadiyyatın canlandırılmasının zəruriliyi ilə izah edir. Əsas diqqət ev təsərrüfatlarının dəstəklənməsinə yönəlib. Ailələr və işçilər, o cümlədən biznes üçün də əhəmiyyətli vergi güzəştləri nəzərdə tutulub.
Müxalifət hakimiyyəti tənqid edir. Sosial Demokratlar hesab edirlər ki, kabinet iqtisadiyyat üzərində nəzarəti itirib və yenidən özündən sonra kəsir buraxmaq riski daşıyır. Mərkəz Partiyası bəyan edir ki, hökumətin işsizliyi azaltmaq, iqtisadi artımı stimullaşdırmaq və tullantıları azaltmaq üçün dəqiq strategiyası yoxdur.
İslahat paketini maliyyələşdirmək üçün dövlət vəsaitin bir hissəsini borc götürməli olacaq, lakin Svantesson tənəzzül kontekstində bunun təbiiliyində və büdcə qaydalarına uyğun olmasında israrlıdır.
Büdcə hazırkı hökumət üçün seçkilər ərəfəsində sonuncu olacaq və bir çox müşahidəçi bunu hakimiyyətin seçicilər arasında mövqelərini gücləndirmək cəhdi kimi qiymətləndirir.
Bölmənin digər xəbərləri
