İsveç Kralı hökmranlığının yarıməsrlik yubileyini qeyd edir
Stokholm, 12 sentyabr, Nərgiz Cəfərli, AZƏRTAC
Kral Karl Qustav Folke Xubertus Bernadot İsveçin tarixində ən uzun müddət hökmranlıq edən hökmdardır: o, 1973-cü il sentyabrın 15-də 27 yaşında taxta çıxıb.
AZƏRTAC xəbər verir ki, Bernadotlar sülaləsinin nümayəndəsi, 1946-cı il aprelin 30-da dünyaya gələn ХVI Karl Qustav taxt-tacını babası VI Qustav Adolfdan miras alıb. Onun atası, şahzadə Qustav Adolf 1947-ci il yanvarın 26-da Danimarkada avtomobil qəzasında həlak olub. Şahzadə atasının ölümü barədə uzun müddət sonra, yeddi yaşı olanda məlumatlandırılıb.
Kralın anası, şahzadə Sibilla Saksen-Koburq-Qotskaya avtomobil qəzasında sağ qalıb. Yeri gəlmişkən, ana tərəfindən Karl Qustav Böyük Britaniya Kraliçası II Elizabet və Belçika Kralı Filippin qohumudur. Maraqlıdır ki, İsveç krallarının nömrələnməsi onların hökmranlığının ardıcıllığına mütləq uyğun deyil. Misal üçün, Kral Karl XVI kimi qeyd olunub, lakin ondan əvvəl cəmi doqquz Karl hökmranlıq edib.
Taxta çıxdıqdan sonra Kral İsveçin bütün qraflıqlarına səfər edib və səfərlərini 1990-cı ildə başa vurub. Kral ilk dövlət səfərini 1974-cü ilin oktyabrında Norveç Kralı V Olavın dəvəti ilə bu ölkəyə səfər edib. Sonra Şimali Avropanın digər ölkələrinə səfərlər həyata keçirilib. Taxtda olduğu müddətdə Kral İsveçin və onun maraqlarının təşviqi üçün xaricə 80-dən çox dövlət səfəri edib.
Hökmdarın vəzifələrinə, həmçinin Riksdaqın illik sessiyasının açılışı, Baş nazir və Nazirlər Kabineti ilə mütəmadi informasiya müşavirələrinin keçirilməsi, Xarici işlər üzrə Şuranın iclaslarında sədrlik, xarici ölkələrin İsveçdəki səfirlərinin etimadnamələrinin qəbulu daxildir. Belə ki, 2021-ci il oktyabrın 26-da Kral sarayındakı rəsmi qəbulda XVI Karl Qustav Azərbaycanın İsveçdəki yeni təyin edilmiş səfiri Zaur Əhmədov da daxil olmaqla, dörd yeni səfiri qəbul edib.
XVI Karl Qustav İsveçin olduqca çox sayda akademiya, təşkilat və assosiasiyalarının himayəçisi və fəxri üzvüdür. “Zamanla ayaqlaşaraq İsveç naminə!” monarxın rəsmi şüarıdır. Kral vergiləri ödəyir və səs vermək hüququna malikdir, lakin köhnə ənənəyə sadiq qalaraq, heç vaxt səs vermir.
Yubiley ili cari ilin yanvarında Kral sarayında şam yeməyindən başlayıb, tədbirə İsveçin bütün qraflıqlarından nümayəndələr dəvət olunub. Yubileyin qeyd olunması çərçivəsində Kral XVI Karl Qustav və kraliça Silviya Zommerlat İsveçin 21 qraflığında olublar, burada onlara qraflıqların sakinləri ilə görüşmək imkanı yaradılıb.
Kralın şərəfinə əsas şənliklərin keçirilməsi sentyabrın 16-na planlaşdırılır. Onlar Stokholmun mərkəzində Kral at yürüşü ilə başlayacaq. Yürüşü bütün marşrut boyunca milli ordu, donanma və aviasiyanın 24 bölməsindən üç min əsgər və dənizçi müşayiət edəcək.
Kral və kraliça şəxsi iqamətgahları olan Drottninqxolm qəsrində personaldan istifadə etməməyə və monarxın da dəfələrlə dediyi kimi, istirahət zamanı “normal” yaşamağa üstünlük verirlər.
Kral cütlüyünün üç övladı var: vəliəhd şahzadə Viktoriya, şahzadə Karl Filipp və şahzadə Madlen.
İsveç Kralı ilklik üzrə varisliyi uyğunlaşdıran dünyada ilk regent olub. 1980-ci ildə Taxt-tacın varisliyi haqqında Qanun Qender-Neytral ilə əvəzlənib, ona uyğun olaraq cinsindən asılı olmayaraq, kral cütlüyünün ən böyük övladı tacı miras alır. Beləliklə, şahzadə Viktoriya XVI Karl Qustavın üç övladından ən böyüyü - vəliəhd və İsveç taxtının varisidir.
Bölmənin digər xəbərləri
