İtaliya və Yunanıstanın təbii qaz idxalında TAP-ın ötənilki payı bəlli olub
Bakı, 22 iyun, AZƏRTAC
Trans-Adriatik Boru Kəməri (TAP) 2025-ci ildə İtaliyanın ümumi təbii qaz idxalının təxminən 16 faizini və boru kəmərləri vasitəsilə idxal olunan qazın 25 faizini təmin edib. Yunanıstanda isə qaz idxalının 14 faizdən çoxu TAP vasitəsilə həyata keçirilib.
Bu barədə AZƏRTAC-a eksklüziv müsahibəsində TAP boru kəmərinin operatoru olan “TAP AG” şirkətinin idarəedici direktoru Luka Skiepatti məlumat verib.
“İstismara verildiyi vaxtdan etibarən TAP Avropaya təxminən 60 milyard kubmetr Xəzər qazı çatdıraraq enerji təchizatının şaxələndirilməsinə və enerji sisteminin dayanıqlığının gücləndirilməsinə mühüm töhfə verib. Bu, xüsusilə İtaliya və Yunanıstan kimi əsas bazarlarda aydın şəkildə müşahidə olunur. Getdikcə daha mürəkkəbləşən enerji mühitində mənbələrin və marşrutların şaxələndirilməsi, eləcə də enerji sistemlərinin dayanıqlığı və çevikliyi daha böyük əhəmiyyət kəsb edir. Bu baxımdan TAP yalnız əlavə qaz həcmləri təqdim etməklə kifayətlənmir, eyni zamanda, regional əlaqəliliyin gücləndirilməsinə və daha inteqrasiya olunmuş Avropa qaz bazarının formalaşmasına dəstək verir. Boru kəmərinin rolu yalnız nəql olunan qaz həcmləri ilə məhdudlaşmır. Ötürücülük gücünün artırılması, əks axın imkanları və gün ərzində çevik qaz çatdırılması kimi əməliyyat xüsusiyyətləri TAP-ın bazar tələblərinə daha operativ cavab verməsinə şərait yaradır. Bundan əlavə, TAP şərq istiqamətində qaz nəqlini mümkün edən yeni ötürücülük məhsullarını istifadəyə verib. Hazırda qaz axınları yalnız qərb istiqamətində – Yunanıstan, Bolqarıstan və İtaliyaya deyil, həm də İtaliyadan Yunanıstan və Bolqarıstana, oradan isə Virtual Ticarət Nöqtəsi və Yunanıstan-Bolqarıstan İnterkonnektoru (IGB) kimi əlaqələndirici infrastrukturlar vasitəsilə Qərbi Balkan ölkələri və Moldova bazarlarına yönləndirilir. Beləliklə, TAP Avropanın enerji sistemində yalnız mənbələrin şaxələndirilməsinə deyil, həm də enerji təhlükəsizliyinin, dayanıqlılığın və çevikliyin artırılmasına mühüm töhfə verir”, - deyə idarəedici direktor əlavə edib.
Qeyd edək ki, TAP Xəzər dənizinin Azərbaycan sektorunda yerləşən nəhəng “Şahdəniz” yatağından hasil olunan təbii qazı Avropaya çatdırır. Boru kəməri Türkiyə-Yunanıstan sərhədində, Kipoidə TANAP ilə birləşir, Yunanıstan (550 kilometr), Albaniya (215 kilometr) əraziləri, Adriatik dənizinin dibi ilə (105 kilometr) keçərək İtaliya cənub sahillərinə (8 kilometr) çıxır.
Boru kəmərinin uzunluğu 878 kilometr, diametri isə 48 düymdür. TAP boru kəmərinin ən aşağı hissəsi dəniz səviyyəsindən təxminən 810 metr dərinlikdə, ən yüksək hissəsi Albaniya dağlarında 1800 metr hündürlükdən keçir. TAP-ın səhmdarları belədir: bp (20 faiz), SOCAR (20 faiz), “Snam S.p.A.” (20 faiz), “Fluxys” (20 faiz) və “Enagás” (20 faiz).
Bölmənin digər xəbərləri
