İtaliya yay mövsümündə turistləri peyvənd pasportu ilə qəbul etməyə hazırlaşır
Roma, 10 aprel, AZƏRTAC
Dünyada koronavirus pandemiyasının yaratdığı iqtisadi problemlərin aradan qaldırılması üçün milli fəaliyyət planlarının həyata keçirildiyi bir dövrdə turizmin inkişaf etdiyi ölkələr qarşıdakı yay mövsümündə turistlərin cəlb edilməsi üçün yollar axtarırlar.
AZƏRTAC xəbər verir ki, İtaliyanın turizm naziri Massimo Qaravaliya yay aylarında peyvənd pasportu olan turistlərin qəbul ediləcəyini elan edib. O, bir çox turizm regionlarında yay tətili üçün sifarişlərin qeydə alındığını əsas göstərərək, artıq iyun ayından belə bir sistemin tətbiqini mümkün hesab edib. Nazir bildirib ki, qarşıdakı turizm mövsümünü təkcə yerli turistlər üçün deyil, eyni zamanda əcnəbi turistlərin qəbulu üçün hazırlamaq istiqamətində bütün qüvvələr səfərbər edilməli və qarşıdakı mövsümün itkiyə getməsinə imkan verilməməlidir.
Həmçinin bildirilib ki, digər ölkələrin nümunəsi əsasında əcnəbi turistlərin peyvənd pasportu əsasında qəbulu ən optimal variant kimi görünür. Çünki Amerika və Avropa İttifaqı sakinləri yay aylarına kimi bu cür pasportlarla təmin olunmalıdırlar və bu da ölkənin əsas turizm mərkəzləri üçün yetərincə böyük turist kütləsi deməkdir.
Qeyd edilməlidir ki, iyunun 2-də İtaliyada yay turizm mövsümünün rəsmi açılışı olmalıdır. İlkin olaraq Siciliya və Sardiniya kimi “koronavirusdan azad” regionların turist qəbul edəcəyi gözlənilir.
Elgün Niftəli
AZƏRTAC-ın xüsusi müxbiri
Roma
Bölmənin digər xəbərləri
