Bakı, 11 sentyabr, AZƏRTAC

Azərbaycan Tibb Universitetinin (ATU) rektoru professor Gəray Gəraybəyli ilə Kanadanın Ontario əyalətinin psixi sağlamlıq və asılılıq problemləri üzrə nazir müavini Maykl Tibollo arasında görüş keçirilib.

Universitetin mətbuat xidmətindən AZƏRTAC-a verilən məlumata görə, kanadalı nazir müavini öz ölkəsində insanların mental sağlamlığının qorunması istiqamətində görülən işlərdən, psixoloji mərkəzlərin fəaliyyətindən, bullinqlə üzləşmiş məktəblilərə mənəvi dəstəkdən və psixoloji yardımın növlərindən danışıb. Qonaq bu sahədə beynəlxalq əməkdaşlığın və qabaqcıl təcrübə mübadiləsinin vacibliyini vurğulayıb.

G.Gəraybəyli qonağa Azərbaycanda son illərdə psixiatriya və psixologiya sahəsində görülən işlər, əldə edilmiş uğurlar, bu istiqamətdə müxtəlif beynəlxalq qurumlarla əməkdaşlıqlar və birgə keçirilən layihələr haqda məlumat verib. Qeyd olunub ki, ölkəmizdə əhalinin sağlamlığının qorunması məqsədilə mütəmadi işlər görülür və dövlət tərəfindən müvafiq qanunlar qəbul edilir. Rektor ATU-dakı təhsil sistemi, psixiatriya və psixologiya üzrə səriştəli kadrların hazırlanması haqqında danışıb.

Eyni zamanda, Azərbaycanın baş psixiatrı olan professor G.Gəraybəyli, ölkəmizdə bu sahənin daha da müasirləşməsinin hədəfdə olduğunu diqqətə çatdırıb.

Daha sonra əməkdaşlıq perspektivləri müzakirə olunub və müxtəlif məsələlərlə bağlı fikir mübadiləsi aparılıb.