Kataliz və Qeyri-üzvi Kimya İnstitutunda konfrans: Azərbaycan qadınlarının elmdə rolu
Bakı, 7 mart, AZƏRTAC
Ulu Öndər Heydər Əliyevin anadan olmasının 100 illik yubileyi münasibətilə Elm və Təhsil Nazirliyinin Kataliz və Qeyri-üzvi Kimya İnstitutunda “Azərbaycan qadınlarının elmdə rolu” mövzusunda konfrans keçirilib.
Bu barədə AZƏRTAC-a institutdan məlumat verilib.
Əvvəlcə Ulu Öndərin əziz xatirəsi anılıb.
Tədbirdə institutun baş direktoru, akademik Dilqəm Tağıyev bildirib ki, Azərbaycanın müstəqilliyinin əldə olunması, qorunması, güclənməsi və dünya dövlətləri arasında tanınması Ümummilli Lider Heydər Əliyevin misilsiz tarixi xidmətlərinin bəhrəsidir. Ulu Öndər Heydər Əliyev bütün həyatını, fəaliyyətini ölkəmizin inkişafına, xalqın xoşbəxtliyinə həsr edib.
Akademik D.Tağıyev dahi rəhbər Heydər Əliyevin ideyalarını uğurla həyata keçirən Azərbaycan Prezidenti İlham Əliyevin apardığı siyasət nəticəsində respublikamızın sürətlə inkişaf etdiyini, torpaqlarımızın işğaldan azad olunduğunu deyib. Qeyd edilib ki, azad edilmiş ərazilərimizdə bu gün geniş miqyasda quruculuq tədbirləri görülür.
İnstitutun Qadınlar Şurasının sədri, kimya üzrə fəlsəfə doktoru Esmira Quluzadə məruzə edərək qeyd edib ki, Ulu Öndər Heydər Əliyev tərəfindən ailə, uşaq və qadın problemlərinin dövlət səviyyəsində həlli ilə bağlı mühüm fərman və sərəncamlar imzalanıb. Azərbaycan 1995-ci il iyunun 30-da Birləşmiş Millətlər Təşkilatının “Qadınlara münasibətdə ayrı-seçkiliyin bütün formalarının ləğv olunması haqqında” Konvensiyasına qoşularaq öz üzərinə müvafiq öhdəliklər götürüb, eyni zamanda, qadınların cəmiyyətin bərabərhüquqlu üzvü kimi yaradılan bütün imkanlardan istifadə etmələri, dövlət idarəçiliyində önə çəkilmələri istiqamətində mükəmməl hüquqi baza formalaşdırılıb.
Vurğulanıb ki, Azərbaycanda qadın hüquqlarının qorunması, onların qanunların qəbul edilməsində fəal iştirakına geniş imkanların yaradılması Heydər Əliyev siyasətinin ayrılmaz tərkib hissələrindən olması danılmaz faktdır.
Laboratoriya müdiri kimya elmləri doktoru Elza Salahova “Azərbaycan qadınlarının elmdə mövqeyi”, institutun Gənc Alim və Mütəxəssislər Şurasının sədr müavini Günel Əzimova “İctimai-siyasi həyatda qadınlar”, kimya üzrə fəlsəfə doktoru Rəna Vəkilova “Ailə və qadın” mövzularında məruzələr ediblər.
Məruzəçilər elmdə və cəmiyyətin ictimai həyatında qadınların rolundan danışıblar.
Sonra Azərbaycan Respublikasının Gənclər Fondunun icraçı direktoru Fərid Cəfərov, AMEA-nın Fəlsəfə və Sosiologiya İnstitutunun direktoru İlham Məmmədzadə, Azərbaycan Respublikasının Prezidenti yanında Dövlət İdarəçilik Akademiyasının professoru Fuad Məmmədov, Heydər Əliyev Mərkəzinin Heydər Əliyev irsinin tədqiqi və təbliği departamentinin Heydər Əliyev Muzeyi şöbəsinin müdiri Rəna Məmmədova və “Regional İnkişaf” İctimai Birliyinin layihələr və könüllülərlə iş şöbəsinin müdiri Hüseyn Abdullayevin mövzu ilə bağlı çıxışları dinlənilib.
Çıxış edənlər əsası Ulu Öndər Heydər Əliyev tərəfindən qoyulmuş dövlət gənclər siyasətinin əhəmiyyətindən, ölkəmizdə qadınların təhsilinə, inkişafına göstərilən xüsusi diqqət və qayğıdan bəhs ediblər.
Bölmənin digər xəbərləri
