KƏND TƏSƏRRÜFATI NAZİRİ KOPENHAGEN KONSENSUS MƏRKƏZİNİN DİREKTORU İLƏ GÖRÜŞMÜŞDÜR
İsmət Abasov aqrar sahədə aparılmış islahatlar, kənd təsərrüfatı məhsulları istehsalı sahəsində qazanılmış uğurlar, emal sənayesi, regionların inkişafına dövlət qayğısı, beynəlxalq maliyyə qurumları ilə birgə reallaşdırılan layihələr barədə məlumat vermişdir.
Byorn Lomborq rəhbərlik etdiyi mərkəzin fəaliyyətindən söz açmış və bildirmişdir ki, onun əsas məqsədi dünyada gedən iqtisadi inkişaf proseslərini araşdırmaqdır. “Kopenhagen Konsensusu” metodologiyası ilk dəfə 2004-cü ilin mayında keçirilmiş konfransda təqdim olunmuşdur. Məlumat verilmişdir ki, həmin konfransda dünyanın aparıcı iqtisadçılarından, o cümlədən 4 Nobel mükafatı laureatrından ibarət səkkiz nəfərlik heyət dünyanın ən mühüm inkişaf problemlərinin həlli sahəsində siyasət prioritetləri üzrə razılığa gəlmişdir.
Xatırladılmışdır ki, Azərbaycan hökuməti ölkənin mümkün siyasət seçimlərinin nəzərdən keçirilməsi məqsədi ilə “Kopenhagen Konsensusu” yanaşması əsasında “Bakı konsensusu” prosesini təşkil etmək niyyətindədir. Bununla da dünyada ilk dəfə olaraq qlobal “Kopenhagen Konsensusu” yanaşması milli səviyyədə tətbiq ediləcəkdir.
Nazir İsmət Abasov əmin olduğunu bildirmişdir ki, Byorn Lomborqun zəngin təcrübəsi “Bakı Konsensusu” layihəsinin uğurla hazırlanmasına kömək göstərəcəkdir. Nazirliyin mütəxəssisləri, aqrarçı alimlər bu konsensus üçün başlıca prioritetlərin seçilməsində, monitorinqlərin keçirilməsində və ilkin materialların hazırlanmasında yaxından iştirak edəcəklər.
Bölmənin digər xəbərləri
