KOFİ ANNAN İSRAİLİ BMT SÜLHMƏRAMLILARINI QƏSDƏN ÖLDÜRMƏKDƏ TƏQSİRLƏNDİRİR

26.07.2006 [21:29]
Çap et
A⁺ A^-

AZƏRTAC Röyterə istinadla xəbər verir ki, BMT-nin baş katibi Kofi Annan İsraildən Livanın Hiyam kəndinin bombalanması şəraitinin ətraflı təhqiqini aparmağı tələb etmişdir.

İyulun 26-na keçən gecə İsrail hərbi hava qüvvələri Livanın cənub bölgələrini yenidən bombalamağa başlamışdır. BMT-nin Hiyamdakı müşahidə mərkəzinin binasına aviasiya zərbəsi endirilməsi nəticəsində BMT sülhməramlı qüvvələrinin Avstriya, Kanada, Çin və finlandiyalı dörd hərbi qulluqçusu həlak olmuşdur.

Baş katib demişdir: “BMT-nin Cənubi Livandakı müşahidə məntəqəsinin aşkar surətdə qəsdən bombalanması məni sarsıtdı və çox kədərləndirdi. Bu, əlaqələndirilmiş artilleriya və hava hücumudur. Halbuki İsrailin Baş naziri Ehud Olmert şəxsən mənə təminat vermişdir ki, onun ölkəsinin ordusu BMT-nin mövqelərini atəşə tutmayacaqdır”.

Kofi Annan vurğulamışdır ki, BMT-nin Hiyamdakı müşahidə məntəqəsinə İsrail aviasiyası gün ərzində 14 dəfə hücum etmişdir.