Komando Qüvvələrinin yaradılması Ordumuzun döyüş qabiliyyətinin artırılması baxımından önəmlidir - Açıqlama
Bakı, 25 iyun, AZƏRTAC
Komando hərbi hissələrinin yaranması ilə paralel olaraq Azərbaycan Ordusunun digər hissə və bölmələrinin silahlanması müasir uzaqmənzilli raketlərin alınması, bir çox ölkələrlə yeni silah təchizatı barədə müqavilələrin imzalanması, yerli müəssisələrlə qardaş və müttəfiq ölkələrin müdafiə, sənaye şirkətlərinin Azərbaycan ərazisində birgə istehsal sahələri yaratması və sair kimi tədbirlər Azərbaycan Ordusunun ən yaxın perspektivdə kifayət qədər yüksək potensiala malik olması etməsi və bütün beynəlxalq reytinqlərdə daha yüksək yerlərdə qərarlaşması ilə nəticələnə bilər. Dövlətimizin başçısının dediyi kimi, Vətən müharibəsindən sonra yeni silahların alınması prosesi davam edir. Həm yeni pilotsuz uçuş aparatlarının, həm də uzaqmənzilli raketlərin ölkəmizə gətirilməsi ilə bağlı bir çox kontraktlar artıq imzalanıb. O raketlər ki, böyük dağıdıcı qüvvəyə və yüksək dəqiqliyə malikdir.
Bu fikirləri AZƏRTAC-a açıqlamasında hərbi ekspert Ədalət Verdiyev deyib.
Ədalət Verdiyev xatırladıb, iyunun 23-də Müdafiə Nazirliyinin komando hərbi hissələrinin birinə Döyüş bayrağını təqdim etmə mərasimində Prezident, Ali Baş Komandan İlham Əliyev çıxışında İkinci Qarabağ müharibəsində Xüsusi Təyinatlı Qüvvələrin xüsusi peşəkarlıq və qəhrəmanlıq göstərdiyini vurğulayaraq deyib: “Bir çox hərbi əməliyyatların keçirilməsində onların xüsusi rolu var idi. Bütün bunları və müasir döyüş əməliyyatlarını nəzərə alaraq yeni Komando Qüvvələrinin yaradılması mənim tərəfimdən qarşıya bir vəzifə kimi qoyulmuşdur və bu vəzifə uğurla icra edilir”.
Ədalət Verdiyevin sözlərinə görə, ilkin mərhələdə komanda hərbi hissələrinin baza və ixtisas kursları əgər Türkiyədə aparılırdısa, artıq bunlar Azərbaycanda həyata keçirilir. Hər bir hərbi hissənin də özünə aid olan maddi-texniki bazası bütün tədris prosesini orada və onun müvafiq poliqonlarında icra etməyə imkan verir. Komanda hərbi hissələrinin sayının daha da artırılması üçün tədbirlər görülür, yeni hərbi hissələr də inşa edilir. Bütün bu işlər Azərbaycan Ordusunun döyüş imkanlarını daha da artırmaq məqsədilə görülür.
Məlumat verilib ki, hazırda komanda hərbi hissələrinin təminat-təchizatına xüsusi diqqət yönəldilib. Ali Baş Komandan İlham Əliyev iyunun 23-də Müdafiə Nazirliyinin komando hərbi hissələrinin birində yaradılan şəraitlə tanış olub. Həmin tədbirdə Ali Baş Komandanımıza komando bölmələrinin silahlanmasında olan kiçik və iriçaplı silahlar, zirehli avtomobil və xüsusi texnika, o cümlədən artilleriya, kəşfiyyat, mühəndis, rabitə və digər döyüş vasitələri, eləcə də zərbə dronları və müxtəlif təyinatlı pilotsuz uçuş aparatları nümayiş etdirildi. Komanda hərbi hissəsinin istifadəsində olan pilotsuz vasitələr, yeni NATO standartlı mühəndis avadanlıqları, uzun mənzilli snayper silahları, zirehli personal daşıyıcıları və sair kimi müasir texnikalar, komanda hərbi hissələrinin silahlanmasına daxildir. Azərbaycan Ordusunun tabeliyində olan komanda hissələri həm Şərqi Zəngəzurda, həm Ermənistanla sərhəddə, həm də digər ölkələrlə sərhədlərimizə yaxın ərazilərdə, həm də Rusiya sülhməramlı kontinentinin müvəqqəti nəzarətində olan Qarabağ iqtisadi rayonuna qismən yaxın ərazilərdə yerləşdirilib. Bunun da əsas məqsədi komando hərbi hissələrinin həm Ermənistanla sərhəddə, həm Rusiyanın Azərbaycandakı sülhməramlı missiyasının nəzarətində olan ərazilərdə baş verə biləcək təxribatlara minimal vaxtda reaksiya verməkdən ibarətdir.
Prezident, Ali Baş Komandan İlham Əliyev Müdafiə Nazirliyinin komando hərbi hissələrinin birində Müdafiə Nazirliyinin strukturunun təkmilləşdirilməsi prosesinin davam etdiyini, hərbi təhsillə bağlı qəbul edilmiş qərarların yaxın gələcəkdə öz bəhrəsini verəcəyinə əminliyini vurğulayıb. Yeni döyüş birləşmələrinin yaradılmasının, o cümlədən Komando Qüvvələrinin yaradılmasının döyüş qabiliyyətimizin artırılması üçün önəmli amillərdən biri olduğunu diqqətə çatdırıb.
Hərbi ekspert bununla bağlı bildirib ki, baza kursuna cəlb olunublar ixtisas kursunu bitirməlidirlər. Yalnız bu hər iki kursu müvəffəqiyyətlə bitirənlər müvafiq rəngdə beret və döş nişanı əldə edirlər. Komando kurslarında şəxsi heyət dərin qar və şiddətli soyuqda döyüş, quru, suüstü komando, hava desant və yaşayış məntəqələrində antiterror əməliyyatları keçirmək üçün hazırlıqdan keçirlər. Bu təlimlər adətən görünmədən görmək, ölmədən dönmək şüarı altında aparılır. Eyni zamanda, komando hərbi hissələri Xüsusi Təyinatlı Qüvvələr üçün kadr ehtiyatı kimi də nəzərdə tutula bilər. Başqa sözlə desək, komando hərbi hissələrində döyüş hazırlığında fərqlənən şəxsi heyətin gələcəkdə Xüsusi Təyinatlı Qüvvələrdə xidmət etməsi mümkündür. Həmin briqadalar öz imkanlarına görə silahlı qüvvələrimizdə yalnız xüsusi təyinatlılarla müqayisə oluna bilər”.
“Vətən müharibəsi başa çatdıqdan sonra Müzəffər Ali Baş Komandan İlham Əliyev Ordumuzun Türk ordu modelinə keçidi barədə bəyanat verdi və bundan qısa müddət sonra biz müxtəlif bölgələrdə yeni komanda hissələrinin açılışını izləməyə başladıq.
Bu gün Azərbaycan Ordusunun hər bir birliyində və korpusların hər birində bir və ya bir neçə komanda briqadası mövcuddur. Onların vəzifələri motoatıcı, hərbi hissələrindəkindən fərqlənir. İkinci Qarabağ müharibəsinin təcrübəsinə əsasən, ordumuzun rəhbəri belə qərar qəbul etmişdi ki, ağır silahlara malik motoatıcı hərbi hissələrin dağlıq və yüksək dağlıq ərazilərdə ağır texnikalarla hücum və ya əks hücum əməliyyatları icra etməsi müəyyən çətinliklər yaradır. Texnikaların dağ keçidlərində, aşırımlarında düşmən tərəfindən müşahidə olunması riskləri böyük olduğuna görə bu ərazilərdə vəzifələri daha çevik və keyfiyyətlə, həm də qısa müddətdə yerinə yetirmək üçün Türkiyədə tətbiq olunan komando briqadalarının və birliklərinin təcrübəsi Azərbaycanda tətbiq edilməyə başlanıb”, - deyə Ə.Verdiyev söyləyib.
Bölmənin digər xəbərləri
