Naxçıvan, 7 aprel, AZƏRTAC

Bu gün iqtisadi tərəqqi və davamlı sosial islahatlar müasir Azərbaycanın inkişaf modelinə çevrilib. Ölkə Prezidenti cənab İlham Əliyevin rəhbərliyi ilə bütün sahələrdə dinamik inkişafa rəvac verilib, Azərbaycan qüdrətli dövlətə çevrilib. Ölkəmizin iqtisadi siyasətinin başlıca istiqamətlərindən birini də regionların tarazlı inkişafı təşkil edir. Şəhər, rayon və kəndlər geniş quruculuq meydanına çevrilib. Bu inkişaf Babək rayonunun da quruculuq xəritəsinin genişlənməsinə səbəb olub, rayonun Yarımca kəndində yeni sosial obyektlər tikilib.

Yarımca kənd tam orta məktəbinin

binası yenidən qurulub

Ölkəmizdə insan kapitalının formalaşdırılmasına hesablanan təhsil islahatları yeni mərhələyə yüksəlib. Tikilən məktəblər gənclərin hərtərəfli hazırlanmasına imkan verir. Bu tədbirlər çərçivəsində Yarımca kənd tam orta məktəbi də əsaslı yenidən qurulub.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, aprelin 7-də Naxçıvan Muxtar Respublikası Ali Məclisinin Sədri Vasif Talıbov məktəb binasında yaradılan şəraitlə tanış olub.

Məlumat verilib ki, 342 yerlik məktəb binasında şagird və müəllimlər üçün hərtərəfli şərait yaradılıb, maddi-texniki baza möhkəmləndirilib, 4-ü elektron lövhəli olmaqla 19 sinif otağı, kimya-biologiya və fizika laboratoriyaları, hərbi kabinə, kompüter, müəllimlər və şahmat otaqları, kitabxana və idman zalı istifadəyə verilib. Məktəbdə kitabxanaçılıq işinin müasir tələblərə uyğun təşkili təmin edilib, kitabxanaya 6 mindən çox ədəbiyyat və dərslik verilib.

Məktəbin kompüter otağında 19 kompüter quraşdırılıb və internetə qoşulub. Elektron lövhəli siniflərdə distant və elektron dərslərin keçirilməsi üçün lazımi şərait yaradılıb, məktəb elektron dərsliklərlə təmin edilib.

Baxış zamanı muxtar respublikanın 192 ümumtəhsil məktəbi ilə “Xan Sarayı” Dövlət Tarix-Memarlıq Muzeyi arasında əlaqə yaradılıb, “Naxçıvan xanlığının yaranması və tarixi əhəmiyyəti” mövzusunda distant dərs keçirilib.

Məktəbin ayrı-ayrı sinif otaqlarında, fənn kabinələrində və laboratoriyalarında müasir tədris ləvazimatları qoyulub, məlumat stendləri asılıb. Bu tədris ilində Yarımca kənd tam orta məktəbində 31 şagird birinci sinfə qəbul olunub.

Ali Məclisin Sədri dəqiq elmlərin tədrisində elektron dərsliklərdən istifadənin əhəmiyyətini qeyd edib, kimya, biologiya, fizika və ibtidai sinif müəllimlərinin hazırlığına diqqət yetirilməsinin vacibliyini bildirib.

Bu gün gənclərin hərbi-vətənpərvərlik ruhunda böyüdülməsi vacib məsələdir. Uşaqların erkən yaşlardan ilkin hərbi biliklərə yiyələnməsi bu baxımdan mühüm əhəmiyyət kəsb edir. Muxtar respublikada gənc nəslin hərbi-vətənpərvərlik tərbiyəsinə xüsusi diqqət yetirilir, ümumtəhsil məktəblərində hərbi kabinələr yaradılır. Məlumat verilib ki, Yarımca kənd tam orta məktəbində də çağırışaqədərki hərbi hazırlıq fənninə xüsusi maraq vardır. Bu il 6 şagird Heydər Əliyev adına Hərbi Liseyə sənəd verəcəkdir. Məktəbdə hərbi kabinənin lazımi əyani vasitələrlə təmin olunması işin daha mütəşəkkil təşkilinə imkan verəcəkdir.

Ali Məclisin Sədri muxtar respublikanın ümumtəhsil məktəbləri şagirdlərinin hərbi hissələrlə və Heydər Əliyev adına Hərbi Liseylə tanışlığının təşkil edilməsi, onların hərb sənətinə marağının artırılması barədə tapşırıqlar verib.

Məktəbdə gənclərin fiziki cəhətdən sağlam böyüdülməsi üçün də hərtərəfli şərait yaradılıb, idman zalı, açıq idman qurğuları və futbol meydançası istifadəyə verilib.

Ali Məclisin Sədri məktəbin müəllimləri ilə görüşüb, onları təbrik edərək deyib: Yarımca kənd tam orta məktəbi müasir tədrisin tələbləri səviyyəsindədir. Kollektiv yaradılan şəraitdən səmərəli istifadə etməli, təhsilli və vətənpərvər gənclər hazırlanmalıdır. Gənclər o zaman dövləti və xalqı üçün yararlı olur ki, onlar təhsilli və vətənpərvər böyüdülsünlər. Ölkəmiz bu gün müharibə şəraitindədir. Torpaqlarımız işğal olunub, şəhidlər veririk. Ona görə də məktəb təhsil verməklə yanaşı, həm də vətənpərvər gənclik yetişdirməlidir. Məktəbi bitirən hər bir şagird gələcəkdə harada işləməsindən asılı olmayaraq vətənpərvər olmalı, ölkəmizə xidmət etməlidir. Ümummilli liderimiz Heydər Əliyev də deyirdi ki, “Gənclərin vətənpərvərlik, Vətənə sədaqət ruhunda tərbiyə edilməsi üçün orta məktəblərdə çox iş görülməlidir”.

Ali Məclisin Sədri deyib: Təhsilli, vətənpərvər və fiziki cəhətdən sağlam gənclik ölkəmizin milli sərvətidir. Bu gün müəllim və şagirdlərin qarşısında bir vəzifə durur: müəllimlər yaxşı təhsil verməli, gəncləri vətənpərvər böyütməli, gənclər isə yaxşı oxumalı, özlərini gələcəyə hazırlamalıdırlar. Yarımca kənd tam orta məktəbinin nailiyyətləri qənaətləndiricidir. Ötən ilin məzunlarından 4-ü ali məktəblərə, 1-i orta ixtisas məktəbinə qəbul olunub, 2 nəfər 500-700 arasında bal toplayıb. Gələcəkdə nailiyyətlər daha da artırılmalı, məktəbdə dəqiq elmlərin tədrisinə xüsusi diqqət yetirilməlidir. Çünki ölkə iqtisadiyyatının bütün sahələrində yeni innovasiyaların tətbiqi dəqiq elmlərin şagirdlərə hərtərəfli öyrədilməsini zəruri edir. Həmçinin məktəbin idman zalından və açıq idman qurğularından səmərəli istifadə olunmalı, gənclər sağlam böyüdülməli, xüsusi istedadı və bacarığı olan uşaqlar üzə çıxarılmalı, onların dərsdənkənar fəaliyyətlərinə diqqət artırılmalıdır.

Ali Məclisin Sədri qarşıya qoyulan vəzifələrin icrasında kollektivə uğurlar arzulayıb.

Müəllim Büllurə İbrahimova çıxış edərək deyib: Son illər muxtar respublikanın kəndlərində kompleks quruculuq işləri aparılır, müasir tələblərə cavab verən məktəblər tikilib istifadəyə verilir. Sevinirik ki, kollektivimiz üçün də müasir tədris şəraiti yaradılıb. Yarımca məktəbində yeni texnologiyalar tətbiq olunub, sinif otaqları, laboratoriyalar və fənn kabinələri ən müasir tədris avadanlıqları ilə təmin edilib, zəngin kitabxana fondu yaradılıb. Bir sözlə, məktəbdə təlim-tərbiyə işinin günün tələblərinə uyğun təşkili üçün hərtərəfli şərait vardır. Bütün bunlar müəllimlərin məsuliyyətini daha da artırır. Söz veririk ki, bu imkanlardan lazımınca bəhrələnəcək, təhsilli, dünyagörüşlü, dilini, bayrağını, torpağını sevən, vətənpərvər və dövlətçiliyimizə sədaqətli gənclər yetişdirəcək, gələcəkdə şagirdlərimiz ali məktəblərə, xüsusi təyinatlı ali hərbi məktəblərə, Heydər Əliyev adına Hərbi Liseyə qəbul olunacaqlar.

Məktəbin həyətində də geniş abadlıq işləri aparılıb, yaşıllıqlar salınıb, istifadəyə verilən bufetdə şagirdlərin sağlam qidalanması təmin olunub.

Yarımca Kənd Mərkəzi istifadəyə verilib

Aprelin 7-də Yarımca Kənd Mərkəzinin açılışı olub.

Naxçıvan Muxtar Respublikası Ali Məclisinin Sədri Vasif Talıbov açılış tədbirində iştirak edib.

Tədbirdə Yarımca kənd inzibati ərazi dairəsi üzrə nümayəndə Əfqan Qəmbərov çıxış edərək deyib ki, kənddə fəaliyyət göstərən dövlət orqanları bu günədək şəraiti olmayan binalarda fəaliyyət göstərirdi. Ötən ildən başlayaraq kənddə geniş quruculuq-abadlıq işləri görülüb, müasir sosial obyektlər, o cümlədən kənd mərkəzi inşa olunub. Bu da əhaliyə göstərilən xidmətin səviyyəsini daha da yüksəldəcəkdir. Lazımi tibbi ləvazimat və dərman preparatları ilə təmin olunmuş həkim ambulatoriyası da sakinlərin sağlamlığının qorunmasında mühüm əhəmiyyətə malikdir. Əfqan Qəmbərov yaradılan şəraitə görə kənd əhalisi adından minnətdarlıq edib.

Naxçıvan Muxtar Respublikası Ali Məclisinin Sədri Vasif Talıbov Yarımca kəndinin muxtar respublikanın müasir və abad yaşayış məntəqəsinə çevrildiyini bildirib, bu münasibətlə sakinləri təbrik edərək deyib: Bu gün ölkəmizdə bütün sahələrin inkişafı təmin olunmuşdur. Yaşayış məntəqələrində geniş quruculuq işləri aparılır. Müasir Azərbaycan kəndinin nümunəsini Yarımca kəndinin timsalında görmək olar. Kənd abadlaşdırılmış, yeni sosial obyektlər tikilmiş, insanların məskunlaşması, rahat yaşayışı və fəaliyyəti üçün hərtərəfli şərait yaradılmışdır.

Ali Məclisin Sədri deyib: Bu gün ölkəmizdə vacib məsələlərdən biri də kəndlərin inkişafıdır. Çünki kəndlərdə yaradılan müasir şərait kənd təsərrüfatının inkişafına geniş imkanlar açır. Kənd təsərrüfatının inkişafı isə ölkədə ərzaq təhlükəsizliyinin təmin olunmasına, xammal istehsalına, yeni sənaye müəssisələrinin yaradılmasına imkan verir. Bütün bunlar isə yeni iş yerlərinin açılması və ölkənin ümumi inkişafı deməkdir. Bu gün Yarımca kəndində insanların rahat yaşayışının təmin olunması məskunlaşmanın artmasına, torpaqlardan səmərəli istifadəyə və insanların məşğulluğunun təmin olunmasına səbəb olmuşdur. Kənddə yaradılan bu şəraitdən dövlət strukturları səmərəli istifadə etməli, tikilənlər qorunmalı, vətəndaşlara nümunəvi xidmət göstərilməlidir. Bu gün məktəb binasının, kənd və xidmət mərkəzlərinin, həkim ambulatoriyasının, yolun, poçt şöbəsinin istifadəyə verilməsi, sürətli və genişzolaqlı internetdən, radio-televiziya yayımlarından istifadə imkanlarının yaradılması insanların rahatlığının təmin olunmasına və yeni iş yerlərinin açılmasına səbəb olmuş, kəndlə şəhər arasındakı fərq aradan qaldırılmışdır. Kənddə bundan sonra da abadlıq işləri davam etdirilməli, torpaqlar əkilməli, dövlət strukturları öz üzərlərinə düşən vəzifələri layiqincə yerinə yetirməlidirlər.

Ali Məclisin Sədri sakinləri bir daha təbrik edib, açılışı bildirən lenti kəsib.

Məlumat verilib ki, üçmərtəbəli kənd mərkəzində rabitə evi, polis sahə və baytarlıq məntəqələri, kitabxana, Yeni Azərbaycan Partiyası ərazi ilk təşkilatı, inzibati ərazi dairəsi üzrə nümayəndəlik, bələdiyyə, klub və 50 yerlik iclas zalı yerləşir. Binanın ikinci mərtəbəsində yerləşən kitabxananın fondunda 7 min 564 kitab vardır.

Kənd təsərrüfatı muxtar respublika iqtisadiyyatının inkişafında mühüm yer tutur. Buna görə də kəndlərdə heyvandarlıq təsərrüfatlarının genişləndirilməsi diqqət mərkəzində saxlanılır. Kənd mərkəzlərində baytarlıq məntəqələrinin yaradılması və lazımi dərman preparatları ilə təmin olunması da həyata keçirilən tədbirlərin davamıdır. Yarımca kəndində də baytarlıq xidmətinin nümunəvi təşkili üçün hərtərəfli şərait yaradılıb.

Ali Məclisin Sədri baytarlıq tədbirlərinin vaxtlı-vaxtında həyata keçirilməsi və sağlam kənd təsərrüfatı məhsullarının istehsal olunması barədə tapşırıqlar verib.

Yarımca kənd bələdiyyəsinin sədri Arif Cəfərov kəndin tarixinə nəzər salaraq inkişafın böyük məmnunluq doğurduğunu, sakinlər tərəfindən razılıqla qarşılandığını bildirib, fərdi təsərrüfatların genişləndirildiyini, torpaqların əkildiyini, bol məhsul istehsal edildiyini diqqətə çatdırıb və bütün bunlara görə minnətdarlıq edib.

Rabitə evində 384 yerlik ATS quraşdırılıb, kəndə 1400 metr fiberoptik xətt çəkilib. Hazırda kənddə 72 internet istifadəçisi vardır. Rabitə evində poçt bölməsi də fəaliyyətə başlayıb, bank və poçt əməliyyatlarının yerinə yetirilməsi üçün lazımi şərait yaradılıb.

Yeni həkim ambulatoriyasında səhiyyə xidməti

nümunəvi təşkil olunacaqdır

Aprelin 7-də Yarımca kəndində həkim ambulatoriyası istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsib, tibbi xidmətin təşkili ilə maraqlanıb.

Məlumat verilib ki, ikimərtəbəli ambulatoriya binasında müasir avadanlıqlarla təchiz edilmiş 12 otaq - baş həkim, doğuş, peyvənd, mama, manipulyasiya, qeydiyyat, feldşer, tibb bacısı və sanitar otaqları, aptek, stomatoloji kabinə və palata yerləşir. Həkim ambulatoriyasının istifadəyə verilməsi kənddə səhiyyə xidmətinin səviyyəsini yüksəldib.

Ali Məclisin Sədri sakinlərin vaxtlı-vaxtında tibbi müayinədən keçirilməsi ilə yanaşı, səhiyyə maarifinin aparılmasının və profilaktik tədbirlərin görülməsinin də əhəmiyyətini qeyd edib, tibbi xidmətin təşkili ilə bağlı tapşırıqlar verib.

Yarımcada yeni xidmət mərkəzi

istifadəyə verilib

Həmin gün Yarımcada yeni xidmət mərkəzi də istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov xidmət mərkəzinin açılışını bildirən lenti kəsib.

Məlumat verilib ki, xidmət mərkəzində bərbərxana, qadın gözəllik salonu, ət satışı yeri, ərzaq və sənaye malları mağazaları fəaliyyət göstərir. Mərkəzdə 5 nəfər işlə təmin olunub.

Xidmət mərkəzi ilə tanışlıqdan sonra kənd sakinləri ilə görüşən Ali Məclisin Sədri deyib ki, Yarımca kəndində görülən işlər sakinlərin rahatlığına səbəb olmuş, onların problemləri öz həllini tapmışdır. Kənd bundan sonra da abad saxlanılmalı, yaşıllaşdırma tədbirlərinə və təmizliyə diqqət yetirilməlidir. Çünki bu tədbirlər kəndin inkişafı ilə yanaşı, həm də sakinlərin sağlamlığının qorunmasına xidmət edir. Kənd əhalisi təsərrüfatlardan səmərəli istifadə etməli, torpaqlar əkilməli, bazarın tələbatına uyğun məhsullar istehsal olunmalıdır.

Sakin Vahid Vəliyev minnətdarlıq edərək deyib: Ölkəmizin iqtisadi qüdrəti ilbəil artır. İnsanların rahatlığı üçün bütün tədbirlər görülür. Qürurverici haldır ki, bu gün muxtar respublikanın təkcə şəhərləri deyil, kəndləri də abadlaşdırılır. Ən ucqar kəndlərdə də yeni məktəblər, kənd və xidmət mərkəzləri tikilir, yollar salınır. Yarımca kəndində geniş-abadlıq quruculuq işlərinin aparılması da sakinləri sevindirir, onlar öz yurd-yuvalarında rahat və firavan yaşayırlar. Bu gün dövlətin yaratdığı şəraitdən lazımınca bəhrələnirik. Kənd əhalisi əkinçiliklə, maldarlıqla məşğuldur. İstifadəyə verilən yeni obyektləri qoruyub saxlayacaq, kəndin daha da abadlaşdırılması qayğısına qalacağıq.

* * *

Yarımca kəndinin yolları abadlaşdırılıb, 950 metrlik asfalt, 2700 metrlik çınqıl qatı verilib, 8 su keçidi qoyulub, beton kanal çəkilib. Rabitə, elektrik və qaz xətləri də yenilənib, 1200 metr rabitə, 890 metr elektrik və yeni tikililərə isə 250 metrlik qaz xətti çəkilib.