Koronavirusun yeni ştamları Tokio iqtisadiyyatına 4 trilyon yenədək zərər vura bilər
Tokio, 10 aprel, AZƏRTAC
Tokio Universitetinin mütəxəssislərinin hesablamalarına görə, koronavirusun yeni ştamlarının yayılmasının qarşısı alınmayacağı təqdirdə, bu, Yaponiya paytaxtının iqtisadiyyatına 4 trilyon yenədək zərər vura bilər.
AZƏRTAC Kyodo agentliyinə istinadla xəbər verir ki, hökumət tərəfindən virusun qarşısının alınması ilə əlaqədar müvafiq tədbirlər görüləcəyi təqdirdə, zərərin qarşısı alına bilər.
Tokio Universitetinin tədqiqatçıları bildirirlər ki, koronavirusun yeni mutasiyalarının sürətlə yayılması mayda Tokioda gündəlik yoluxma sayını 1400 nəfərədək artıra bilər. Qeyd edilir ki, aprelin əvvəllərində bu göstərici təqribən 500 nəfərə çatır.
Tokio Universitetinin dosentləri Taysuke Nakata və Daysuke Fucinin rəhbərlik etdiyi qrup üzvlərinin rəyinə görə, hadisələr belə davam edərsə, paytaxt iqtisadiyyatına 3,76 trilyon yen zərər dəyə bilər.
Alimlərin bildirdiyinə görə, yeni ştamların yayılmasının qarşısı alınacağı təqdirdə isə bu rəqəm 2 trilyon yendən çox olmayacaq.
Həmçinin bildirilir ki, hökumət tərəfindən müvafiq tədbirlər görülərsə, mayda koronavirusun gündəlik yayılması 1000 nəfərdən çox olmayacaq və bu göstərici ilin sonunadək azalmaqda davam edəcək.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
