KXDR-in ballistik raket sınağının bəzi təfərrüatları açıqlanıb
Bakı, 2 aprel, AZƏRTAC
Koreya Respublikası KXDR-in şərq sahillərindəki sulara doğru ballistik raketi sınaqdan keçirdiyini bildirib.
AZƏRTAC “Associated Press” agentliyinə istinadla xəbər verir ki, Cənubi Koreyanın Birləşmiş Qərargah Rəisləri Komitəsi Pxenyan yaxınlığından buraxılan raketin təxminən 600 kilometr məsafə qət edərək dənizə düşdüyünü qeyd edib.
Qurumun mətbuat katibi Li Sunq Cun bildirib ki, buraxılış Şimali Koreyanın mart ayında hazırladığı yeni ortamənzilli hipersəs raketi üçün bərk yanacaq mühərrikinin sınağından sonra baş verib. Mütəxəssislərin fikrincə, bu cür raketlər ABŞ-ın Sakit okeandakı hərbi mərkəzi Quama çata bilər.
Yaponiya Müdafiə Nazirliyi raketin 100 kilometr yüksəkliyə qalxaraq Yaponiyanın müstəsna iqtisadi zonasından kənar sulara düşdüyü barədə məlumat yayıb. Ölkənin Sahil Mühafizə Xidməti həmin ərazidən keçən gəmiləri ehtiyatlı olmağa çağırıb.
Yaponiyanın Baş naziri Fumio Kişida Şimali Koreyanın tez-tez həyata keçirdiyi raket sınaqlarının yalnız Yaponiyanın deyil, həm də regionun sülh və təhlükəsizliyini və beynəlxalq təhlükəsizliyi təhdid etdiyini vurğulayıb.
Son illər Şimali Koreya bərk yanacaqla çalışan raketləri inkişaf etdirməyə daha çox diqqət yetirir. Ölkənin bu il sınaqdan keçirdiyi digər silahlar arasında qanadlı raketlər və paytaxt Seula yönələn çoxsaylı reaktiv yaylım atəşi sistemləri də var.
Bölmənin digər xəbərləri
