Laçın Böyük Qayıdışın uğurlu nümunəsi ilə diqqət çəkir ŞƏRH
Bakı, 26 avqust, AZƏRTAC
Zəngin, füsunkar təbiətə, müxtəlif coğrafi, iqlim xüsusiyyətlərinə malik Vətənimizin hər bir guşəsi, o cümlədən şəhər, rayon və kəndlərimiz bizim üçün, bütün Azərbaycan xalqı üçün əzizdir.
Bunu AZƏRTAC-a açıqlamasında Milli Məclisin deputatı Məzahir Əfəndiyev deyib.
Bu gün Azərbaycanın yüksək dinamika ilə inkişaf etdiyini, mühüm nailiyyətlərə imza atdığını deyən M.Əfəndiyev xatırladıb ki, müstəqilliyimizin ilk illərində Ermənistan Azərbaycanın ayrılmaz hissəsi olan Qarabağı işğal etdi və bu işğal 30 il ərzində xalqımızın dinməz ağrısına çevrildi. 2020-ci ildə Prezident İlham Əliyevin rəhbərliyi ilə Müzəffər Ordumuz 44 günlük Vətən müharibəsində torpaqlarımızı azad etdi və ölkənin inkişafında keyfiyyətcə yeni mərhələnin əsasını qoydu. İşğaldan azad olunmuş ərazilərdə ötən altı ildə yenidənqurma, bərpa və abadlıq işləri həyata keçirilir, müasir idarəçilik modelinin tətbiqi Şərqi Zəngəzur və Qarabağ iqtisadi rayonlarını yeni inkişaf mərkəzlərinə çevirir. Ümumiyyətlə, Prezident İlham Əliyevin rəhbərliyi ilə Azərbaycanın bütün regionlarının sosial-iqtisadi inkişafına xüsusi diqqət ayrılır, xalqımızın rifah halının yaxşılaşdırılması üçün ardıcıl və davamlı siyasət həyata keçirilir.
“Bu günlərdə xalqımız Laçın şəhərinin işğaldan azad edilməsinin ildönümünü qeyd edir. Belə ki, Azərbaycan Prezidentinin 2023-cü il 31 iyul tarixli Sərəncamına əsasən, avqustun 26-sı Laçın şəhərinin işğaldan azad edilməsi günü kimi qeyd olunur. Birinci Qarabağ müharibəsində böyük strateji əhəmiyyətə malik Laçın rayonu 1992-ci il mayın 18-də Ermənistan silahlı qüvvələri tərəfindən işğal olunmuşdu. 217 mədəniyyət, 101 təhsil, 142 səhiyyə müəssisəsi, 462 ticarət, 30 rabitə, 133 idarə və müəssisə, 5 musiqi məktəbi, 1 internat məktəbi, 1 orta texniki peşə məktəbi, 2 avtonəqliyyat və müxtəlif təyinatlı istehsal müəssisələri işğalçılar tərəfindən talan və məhv edilmişdi. Vətən müharibəsində əldə etdiyimiz Qələbə nəticəsində imzalanmış üçtərəfli Bəyanata əsasən 2020-ci il dekabrın 1-də Laçın rayonu Azərbaycana təhvil verildi. 2022-ci il avqustun 26-da isə Laçın şəhəri, Zabux və Sus kəndləri nəzarətə götürüldü. Artıq Azərbaycan xalqı böyük qürur və fəxarət hissi ilə öz doğma torpaqlarına qayıdır. Böyük Qayıdış çərçivəsində uzun fasilədən sonra Laçın sakinlərinin öz doğma şəhərinə qayıdışı baş tutur”, - deyə deputat əlavə edib.
O bildirib ki, bu gün Laçında həyata keçirilən genişmiqyaslı quruculuq işləri yüksək zövq və keyfiyyətlə aparılır. Sevindirici haldır ki, Laçına səfər edən qonaqlar Azərbaycan Hökuməti tərəfindən həyata keçirilən abadlıq işləri ilə tanış olurlar. 2025-ci il iyunun 13-də Azərbaycan ictimaiyyətinə təqdim olunmuş Baş Plan əsasında Laçının əvvəlki şöhrəti bərpa olunmaqdadır. Burada məskunlaşma siyasəti uğurla icra olunur. Belə ki, 31 ildən sonra, 2023-cü il mayın 28-dən başlayaraq laçınlıların doğma yurda qayıdışına start verilib. Bu xüsusda Prezident İlham Əliyevin sakinlərlə görüşü, onlara evlərinin açarlarını şəxsən təhvil verməsi, 2020-ci ildən Laçına 9 səfəri və infrastruktur layihələrinin açılışlarında iştirakı işğaldan azad olunmuş ərazilərdə yenidənqurma işlərinin diqqət mərkəzində olduğunu və Azərbaycanın regionda sülhün təmin olunmasında qətiyyətini göstərir.
“Burada böyük nəqliyyat, sənaye, turizm infrastrukturu, həm də dədə-baba yurdlarına qayıdan soydaşlarımız üçün lazımi bütün şərait yaradılır. Təsadüfi deyil ki, MDB Humanitar Əməkdaşlıq Şurasının 2024-cü il oktyabrın 8-də qəbul etdiyi qərara əsasən, Laçın şəhəri 2025-ci ildə “MDB-nin mədəniyyət paytaxtı” elan olunub. Əlavə olaraq, Laçın şəhəri digər dost dövlətlərin şəhərləri ilə də qardaşlaşır. Keçdiyimiz günlərdə, 2026-cı il avqustun 23-də Prezident İlham Əliyevin Özbəkistana dövlət səfəri çərçivəsində Azərbaycan və Özbəkistan arasında “Laçın şəhəri ilə Buxara şəhəri arasında qardaşlaşma münasibətlərinin qurulması haqqında Protokol” imzalanıb.
Bu gün Laçın şəhəri sürətli inkişafı, müasir infrastrukturu və yenidən qurulan sosial-mədəni həyatı ilə işğaldan azad olunmuş ərazilərimizdə Böyük Qayıdışın uğurlu nümunəsinə çevrilir. Burada aparılan genişmiqyaslı quruculuq işləri, sakinlərin doğma yurda qayıdışı və beynəlxalq əməkdaşlığın genişlənməsi Laçının yeni inkişaf mərhələsinə qədəm qoyduğunu göstərir”, - deyə M.Əfəndiyev vurğulayıb.
Bölmənin digər xəbərləri
