Laçın-Xankəndi yolu: Aksiyanın xanım iştirakçıları ilə - REPORTAJ
Şuşa, 8 mart, Elmir Səftərov, AZƏRTAC
Şuşa ərazisindən keçən Laçın-Xankəndi yolunda dekabrın 12-dən başlayan dinc aksiya artıq 87 gündür ruh yüksəkliyi ilə davam edir. Havanın soyuq olmasına baxmayaraq, aksiya iştirakçılarının ərazidə fəallığı müşahidə olunur. Onlar Qarabağda faydalı qazıntı yataqlarının qanunsuz istismarının dayandırılması ilə bağlı Azərbaycan, rus və ingilis dillərində mütəmadi olaraq plakatlar qaldırır, "Azərbaycan oyaqdır, sərvətinə dayaqdır!”, “Ekoloji cinayətə son!” və sair şüarlar səsləndirirlər. Aksiya iştirakçıları tələbləri yerinə yetirilməyənədək etirazlarını davam etdirəcəklərini bildirirlər.
Aksiya iştirakçıları artıq ikinci bayramı Laçın-Xankəndi yolunda qeyd edirlər. Ekofəallar bundan əvvəl 31 Dekabr - Dünya Azərbaycanlılarının Həmrəyliyi Gününü və Yeni ili Şuşada qeyd ediblər. Bildiyimiz kimi, bu gün 8 Mart- Beynəlxalq Qadınlar Günüdür. Azərbaycan qadını cəmiyyətin əksər sahələrində olduğu kimi, Vətən mövzusunda da daim ön sıralarda olub. Aksiya başlayan gündən ekofəalların arasında oğlanlarla bərabər, xanımlar da yer alıblar. Onlar da gecə-gündüz Laçın-Xankəndi yolunda öz haqlı tələblərini səsləndirir, oğlanlarla çiyin-çiyinə öz postlarında ruh yüksəkliyi ilə dayanıblar.
AZƏRTAC-ın müxbiri Laçın-Xankəndi yolunda keçirilən aksiyada iştirak edən xanımların bəziləri ilə həmsöhbət olub.
Könüllü Aygün Məmmədova aksiyada iştirak etdiyi üçün çox sevincli olduğunu vurğulayıb. O deyib: "90 günə yaxındır ki, aksiyalarımız davam edir. Bu gün isə 8 Mart- Beynəlxalq Qadınlar Günüdür. Əlbəttə ki, iştirakçılar arasında xanımlar da var. Bu münasibətlə bütün Azərbaycan xanımlarını təbrik edirəm".
Digər könüllü Ülkər Həmzəyeva bildirib ki, havanın şaxtalı keçməsi onları məqsədlərindən döndərməyib və döndərməyəcək. Heç bir çətinlik onlara mane olmur. İlk gündən qeyd etdikləri kimi, tələbləri yerinə yetirilməyənədək aksiyalar davam edəcək.
“Biz “ekoloji cinayətlərə son!” deyirik. Azərbaycan gəncləri Vətəni üçün əllərindən gələni əsirgəmirlər. Biz qadınlar da bayram ərəfəsi olmayaraq buradayıq. Söhbət Vətəndən gedirsə, biz bu yoldan dönmərik. Aksiyada iştirak edən xanımları, eləcə də bütün Azərbaycan qadınlarını 8 Mart - Beynəlxalq Qadınlar Günü münasibətilə səmimi-qəlbdən təbrik edirəm. Bundan sonrakı bayramlarımızı da işğaldan azad olunan bütün torpaqlarımızda keçirməyi arzulayıram”, - deyə Ü.Həmzəyeva vurğulayıb.
Ekofəal Könül Abasova deyib ki, soyuq, şaxtalı hava onların iradəsini sındırmır. Qadınlarımız ipək kimi həm zərif, həm də möhkəmdirlər. “Bizim tələblərimiz dəyişməz olaraq qalır və aksiya davam edir. Əsas məqsədimiz Qarabağda ermənilər tərəfindən törədilən ekoloji cinayətin dayandırılmasıdır”, - deyən Könül Abasova əlavə edib ki, tələbləri yerinə yetirilənədək aksiyanı davam etdirəcəklər. Azərbaycan könüllüləri aksiyanın ilk günü günlərində olduğu kimi, yenə də həvəsli və qətidirlər.
Bölmənin digər xəbərləri
