Laçında aparılan quruculuq işləri Azərbaycanın sülhə və dinc inkişafa yönəlmiş siyasətinin göstəricisidir – ŞƏRH
Bakı, 26 avqust, AZƏRTAC
Laçın coğrafi parametrlərinə görə Azərbaycanın tarixində mühüm qovşaq rolunu oynayıb. Azərbaycanın tarixi ərazilərinin daha geniş olduğu nəzərə alınarsa, Laçının yerləşdiyi coğrafiyanın ölkənin nəqliyyat-kommunikasiya sistemindəki əhəmiyyəti daha aydın görünür. Hələ çar Rusiyası dövründə Laçının nəqliyyat-kommunikasiya imkanlarının artırılmasına böyük diqqət yetirilir, XVIII əsrin ortalarından XIX əsrə qədər mərkəzi hökumət tərəfindən Laçından Türkiyə sərhədinə qədər uzanan yolların yenidən qurulması və modernləşdirilməsi üçün xüsusi vəsait ayrılırdı.
Bu fikirləri AZƏRTAC-a açıqlamasında politoloq Tofiq Abbasov deyib.
O bildirib ki, həmin dövrdə “Yuxarı yol” adlandırılan marşrut öz dövrü üçün xüsusi strateji məqsədlərlə salınmışdı. Yolun tikintisi zamanı yalnız insanların deyil, zəruri hallarda artilleriya qurğuları və hərbi texnikanın hərəkət edə bilməsi də nəzərə alınmışdı.”Dağlıq relyefə baxmayaraq, uzun məsafəyə hesablanmış belə bir kommunikasiya xəttinin yaradılması Laçının coğrafi mövqeyinin əhəmiyyətini bir daha nümayiş etdirir. Bu yol bu gün də istifadə olunur və onun tarixi funksiyası Laçının mühüm kommunikasiya məntəqəsi olduğunu göstərir. İşğal dövründə Ermənistan tərəfi Laçın və Kəlbəcərin Azərbaycana qaytarılmasının mümkün olmadığını bildirərək, bu ərazilərə xüsusi strateji əhəmiyyət verib. Lakin vəziyyət elə gətirdi ki, Prezident İlham Əliyevin sülhə məcburetmə strategiyası nəticəsində Laçın şəhəri bir güllə belə atılmadan Azərbaycana qaytarıldı. Bu, Azərbaycanın həm hərbi-siyasi gücünün, həm də dövlət siyasətinin nəticəsi idi. Hazırda Laçının inkişafı xüsusi proqram əsasında həyata keçirilir və Laçının nəqliyyat-kommunikasiya sistemində xüsusi qovşaq və regional hab kimi formalaşdırılması istiqamətində ardıcıl işlər görülür. Laçın hava limanının inşası, yolların, tunellərin və körpülərin salınması rayon daxilində hərəkətin daha rahat və təhlükəsiz təşkilinə imkan verəcək. Bu infrastruktur həm əhalinin gündəlik gediş-gəlişini asanlaşdıracaq, həm də yükdaşıma imkanlarını genişləndirəcək. Laçının sərhədyanı rayon olması onun əhəmiyyətini daha da artırır. Rayonun xarici çıxış imkanlarının olması gələcəkdə burada gömrük, ticarət, logistika və digər iqtisadi fəaliyyətlərin genişlənməsi üçün yeni imkanlar yaradır. Laçında həyata keçirilən genişmiqyaslı quruculuq işləri Azərbaycanın sülhə və dinc inkişafa yönəlmiş siyasətinin də göstəricisidir. Şəhərin və rayonun bərpasına yönəldilən böyük investisiyalar yalnız infrastruktura qoyulan vəsait deyil, eyni zamanda, sülhün və sabitliyin sosial-iqtisadi dayaqlarının möhkəmləndirilməsinə yönəlmiş addımlardır”, – deyə politoloq vurğulayıb.
Tofiq Abbasov bildirib ki, hazırda Laçına giriş istiqamətində yerləşən Güləbird kəndindən başlayaraq rayonun yaşayış məntəqələrinin böyük hissəsində abadlıq və yenidənqurma işləri aparılır. Lakin mina təhlükəsi bu prosesin qarşısında duran əsas məsələlərdən biridir:“Rayon ərazisinin minalardan tam təmizlənməsi xüsusi diqqət tələb edir. Minatəmizləmə işlərində tələsmək, hər hansı eksperimentə yol vermək olmaz. Bu işlər xüsusi texnika və mütəxəssislərin hazırladığı plan əsasında, təhlükəsizlik qaydalarına ciddi riayət edilməklə aparılmalıdır. Rayon ərazisi tam təhlükəsiz vəziyyətə gətirildikdən sonra qarşıda yeni və daha geniş inkişaf mərhələsi açılacaq”.
Politoloq Laçının böyük turizm potensialına da diqqət çəkib. Onun sözlərinə görə, dağlar, meşələr, yüksək dağ çəmənlikləri, mineral sular və təmiz dağ havası rayonun turizm imkanlarını əhəmiyyətli dərəcədə artırır.“Doğma ərazilərin işğaldan azad edilməsindən sonra Prezident İlham Əliyevin rəhbərliyi ilə burada yeni həyatın qurulması üçün genişmiqyaslı layihələr həyata keçirilir. Unikal kurort mərkəzləri, yaşayış kompleksləri, müasir infrastruktur və yeni iş imkanları rayonun gələcək inkişafının əsasını təşkil edir. İnsanların doğma torpağa bağlanması üçün yalnız evlərin tikilməsi kifayət deyil. Orada iş yerləri, sosial infrastruktur, rahat kommunikasiya və iqtisadi fəaliyyət imkanları olmalıdır. Bu baxımdan laçınlıların özlərinin də proseslərdə fəal iştirakı çox vacibdir. Dövlətlə yanaşı, yerli təşəbbüslərin də meydana çıxması quruculuq prosesinə əlavə dinamika verə bilər. İslahatların əsas qayəsi insanların həyatında real sosial effekt yaratmaq, onların həyat tərzini və keyfiyyətini yaxşılaşdırmaqdır. Bu baxımdan Laçında baş verən dəyişikliklər xüsusi əhəmiyyət daşıyır. Qarşıdakı illərdə həm şəhərin, həm də kəndlərin abadlaşmasının, insanların öz doğma yurdlarına daha möhkəm və üzvi şəkildə bağlanmasının şahidi olacağıq”, – deyə Tofiq Abbasov vurğulayıb.
Müxbir - Səbinə Əlizadə
Bölmənin digər xəbərləri
