“LALƏ-TEKSTİL” MƏHDUD MƏSULİYYƏTLİ CƏMİYYƏTİNİN SƏDRİ ARZU HACIYEVANIN ÇIXIŞI
-Möhtərəm cənab Prezident!
Hörmətli konfrans iştirakçıları!
Ötən il oktyabrın 24-ü mənim və rəhbərlik etdiyim kollektivin həyatında ən xoşbəxt günlərdən biridir. Həmin gün Siz, cənab Prezident, Mehriban xanımla birlikdə Yevlaxda olarkən bizim ən böyük arzumuzu reallaşdırdınız, müəssisəyə gələrək gördüyümüz işlərlə tanış oldunuz. Dövlət başçısının sahibkarın fəaliyyətinə verdiyi qiymətdən böyük nə ola bilər? Biz hələ də bu görüşün təəssüratları altında yaşayır və fəaliyyət göstəririk. Fürsətdən istifadə edərək çoxsaylı kollektivimizin salamlarını və ən xoş arzularını Sizə çatdırıram. Həmkarlarım bunu məndən təkidlə xahiş etmişdilər.
Bu gün böyük fəxr hissi ilə deyə bilərəm ki, bir Azərbaycan qadını, Yevlax şəhərinin sakini kimi, Azərbaycanın gündən-günə artan iqtisadi qüdrətini mən də digər həmvətənlərim kimi gündəlik həyatımda hiss edirəm. Belə ki, Dövlət Proqramı çərçivəsində görülmüş işlər nəticəsində Azərbaycanın hər bir guşəsində olduğu kimi, Yevlax şəhərinin, onun qəsəbə və kəndlərinin siması da tamamilə dəyişmişdir. Bu yaxınlarda Yevlaxda olarkən şəhərimizin axşam görüntülərinin dünyanın ən qabaqcıl şəhərləri səviyyəsində olduğunu qeyd etmişdiniz. Bəli, cənab Prezident, hər bir yevlaxlı qürur hissi keçirir və fəxr edir ki, belə bir şəhərdə yaşayır və qurub yaradır.
Ölkədə yaradılmış əlverişli biznes mühiti, sahibkarlığın inkişafına Sizin tərəfinizdən göstərilən diqqət bir iş adamı kimi, mənim də fəaliyyətimin uğurunu təmin etmişdir. Heç kimin ağlına gələ bilməzdi ki, belə qısa zamanda Yevlaxda tekstil fabriki yaranacaq, onun da sahibi qadın olacaqdır. Bu gün rəhbər dövlət vəzifələrində olduğu kimi, sahibkarlığın inkişafında qadınların xüsusi çəkisi günbəgün artmaqdadır. Əlbəttə, bundan sonra daha da artacaqdır. Cənab Prezident, bu, Sizin apardığınız siyasətin nəticəsidir. Buna görə də mən Sizə minnətdaram.
Qanunvericilik bazasının təkmilləşdirilməsi, iş adamlarına dövlət dəstəyinin artırılması nəticəsində yerli sahibkarlar tərəfindən ölkə iqtisadiyyatına sərmayə qoyuluşu nəzərəçarpacaq dərəcədə yüksəlmiş, ilk dəfə olaraq yerli sərmayələrin həcmi xarici investisiyaları üstələməsidir. Bu gün niyyəti, amalı düzgün olan elə bir sahibkar tapmaq olmaz ki, yaradılmış şəraitdən razılıq etməsin.
Hörmətli konfrans iştirakçıları!
Rəhbərlik etdiyim “Lalə-tekstil” müəssisəsi vaxtı ilə demək olar ki, fəaliyyətsiz olan kiçik bir tikiş sexi idi. 2004-cü ildə bu sexi özəlləşdirdikdən sonra onun bazasında müasir tələblərə cavab verən bir tekstil müəssisəsi yaratmaq qərarına gəldim. Təbii ki, belə bir müəssisənin yaradılması böyük vəsait tələb edirdi.
Cənab Prezident, Sizin diqqət və qayğınızın nəticəsidir ki, bu gün yüzlərlə iş adamı güzəştli kreditlərdən bəhrələnə bilir. Mən də onlardan biriyəm. İşə aldığım 1 milyon ABŞ dolları məbləğində güzəştli kreditlə başladım.
Bu gün artıq müəssisəyə investisiya qoyuluşunun ümumi məbləği 4 milyon manatı keçmişdir. Müəssisədə quraşdırılmış avadanlıq Almaniya, Yaponiya və Türkiyə istehsalıdır. Müəssisəmiz 11 hektar əraziyə malik olmaqla 4 tikiş bölməsindən, biçim, hörücü və boya sexlərindən, sərgi-satış salonundan və digər yardımçı binalardan ibarətdir. Biz istehsalat üçün zəruri olan xammalı xarici ölkələrlə yanaşı, Gəncədən də alırıq. Beləliklə, bizim və buna oxşar digər müəssisələrin fəaliyyəti əlaqədar sahələrin inkişafına təkan verir, orada da yeni iş yerləri açılır.
Fabrikdə əksəriyyəti qadın olmaqla 650 nəfər işləyir. Bununla yanaşı, bizdə 7 nəfər xarici mütəxəssis də çalışır. İşçilərimiz üçün hər cür şərait yaratmışıq. Bu gün onlar 500 nəfərlik yeməkxanada müəssisənin hesabına qida ilə təmin edilirlər. Hazırda fabrikdə kişi və qadın, eləcə də uşaq geyimləri istehsal olunur və bu məhsullar Yevlaxda və Bakıda yaradılmış satış şəbəkəsi vasitəsilə yerli bazarda satılır. Bizim markamızla buraxılan məhsullar İran, Rusiya, Gürcüstan və digər ölkələrə də ixrac olunur. Lakin mənim əsas məqsədim istehsal olunan məhsulları Avropa bazarına çıxarmaqdan ibarətdir. Buna həm istehsal olunan məhsulların keyfiyyəti, həm də işçilərimizin yüksək bacarığı və səriştəsi imkan verir. Düşünürəm ki, məhsul istehsalı ilə məşğul olan, xidmət sahəsində çalışan hər bir sahibkar Azərbaycanın ticarət markasını Sizin müəyyənləşdirdiyiniz səviyyəyə qaldırmalıdır.
Cənab Prezident!
Sizin tərəfinizdən sahibkarlar üçün yaradılmış əlverişli şəraitdən istifadə edərək biz yerli istehsalı genişləndirmək qərarına gəlmişik. Hazırda ümumi sahəsi 2800 kvadratmetr olan kişi, qadın və uşaq kostyumları istehsal edəcək 5-ci tikiş bölməsini inşa edirik. Burada quraşdırılacaq avadanlığın ümumi dəyəri 2 milyon ABŞ dolları təşkil edəcək, nəticədə istehsal gücü 2 dəfə artacaq, əlavə 450 iş yeri açılacaqdır. Beləliklə, ilin sonuna fabrikimizdə 1200 nəfər çalışacaqdır.
Konfrans iştirakçılarının diqqətini bir məsələyə də cəlb etmək istəyirəm ki, fabrikdə işçilər qəbul edilərkən onlarla 3 ay ərzində tikiş peşəsinin öyrədilməsi ilə bağlı tədris aparılır.
Bu kürsüdən bir məlumatı da vermək istəyirəm. Biz artıq Yevlax şəhərində 450 nəfərin çalışacağı yuyucu vasitələr istehsal edəcək “Lalə-kemikal” müəssisəsinin yaradılmasına da başlamışıq.
Möhtərəm cənab Prezident!
Sahibkarlar ordusunun formalaşması, inkişafı, bu günü və sabahı Sizinlə bağlıdır. İş adamlarının mütləq əksəriyyətinin fikri belədir. Bu şəraiti bizə Siz yaratmısınız. Əmin ola bilərsiniz ki, biz də üzərimizə düşən vəzifələri məsuliyyətlə yerinə yetirəcək, bütün potensialımızı səfərbər edəcək, Sizin Azərbaycanın tərəqqisinə yönələn fəaliyyətinizi daim dəstəkləyəcəyik.
Diqqətinizə görə sağ olun.
X X X
Azərbaycan Prezidenti İlham Əliyev konfransa yekun vurdu.
Bölmənin digər xəbərləri
