“Lənkəran: ensiklopedik məlumat” kitabı çapdan çıxmışdır
Lənkəran, 14 aprel (AZƏRTAC). Azərbaycan Yazıçılar Birliyinin üzvləri Mirhaşım Talışlı və Etibar Əhədovun həmmüəllifləri olduqları “Lənkəran: ensiklopedik məlumat” kitabı çapdan çıxmışdır.
AZƏRTAC xəbər verir ki, kitab Lənkəran rayonunun ictimai-siyasi və mədəni həyatından bəhs edir.
Bundan əvvəl Lənkəranla bağlı məlumat xarakterli bir sıra kitablar nəşr olunsa da, onlarda rayonun coğrafi, etnoqrafik, sosial və mədəni həyatı, görkəmli şəxsiyyətləri haqqında tam məlumat əksini tapmamışdır.
Bu gün Lənkəran rayonu Azərbaycanda aparılan sosial-iqtisadi və mədəni islahatların nəticəsi olaraq sürətlə inkişaf edir. İnkişafın yeni mərhələsində Lənkəranın tarixi keçmişini, bu gününün reallıqlarını əks etdirən yeni nəşr oxuculara böyük hədiyyədir.
Kitabda Lənkəranın tarixi, coğrafiyası, toponimikası, yerli əhalinin milli mənəvi dəyərləri, idarə, rayonun müəssisə və təşkilatları, tanınmış şəxsiyyətləri, elm və sənət adamları, ölkəmizin müstəqilliyi və ərazi bütövlüyü uğrunda şəhid olanlar, qəhrəmanlar, yaşayış məntəqələri, elm, təhsil müəssisələri haqqında geniş məlumat verilmişdir.
Yeni nəşrdə, həmçinin müasir Azərbaycan dövlətinin memarı və qurucusu, ümummilli lider Heydər Əliyev və onun siyasi xəttinin layiqli davamçısı Prezident İlham Əliyev, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyeva haqqında və onların Lənkərana səfərləri barədə ayrıca bölmə də yer almışdır.
Bölmənin digər xəbərləri
