Lənkəranda 20 Yanvar faciəsi qurbanlarının ailələri və iştirakçıları ilə görüş keçirilib
Lənkəran, 19 yanvar, Bağır Əliyev, AZƏRTAC
Lənkəran Şəhər İcra Hakimiyyətində 20 Yanvar şəhidlərinin ailələri və iştirakçıları ilə görüş keçirilib.
AZƏRTAC xəbər verir ki, əvvəlcə 20 Yanvar şəhidlərinin xatirəsi bir dəqiqəlik sükutla yad edilib.
Görüşdə çıxış edən Lənkəran Şəhər İcra Hakimiyyətinin başçısı Taleh Qaraşov 1990-cı il yanvarın 19-dan 20-ə keçən gecə sovet qoşunlarının Bakıda törətdiyi qətliamdan danışıb. SSRİ-nin o vaxtkı rəhbəri M.Qorbaçovun tapşırığı ilə Azərbaycan xalqına qarşı Bakıda törədilən misli görünməmiş qanlı terror aktından söhbət açan T.Qaraşov ulu öndər Heydər Əliyevin ikinci dəfə hakimiyyətə qayıdışından sonra bu faciəyə hüquqi qiymətin verildiyini diqqətə çatdırıb.
Görüşdə çıxış edən “20 Yanvar” Cəmiyyəti Lənkəran rayon şöbəsinin sədri Yusif Abdullayev, şəhid ailələrinin üzvləri və əlillər onlara göstərilən diqqət və qayğıya görə dövlətimizin başçısına minnətdarlıqlarını bildiriblər.
Tədbirin sonunda şəhid ailələrinin üzvlərinə və əlillərə şəhər icra hakimiyyəti tərəfindən maddi yardımlar edilib, onlara ərzaq məhsulları paylanılıb.
Bölmənin digər xəbərləri
