İQTİSADİYYAT
Lipetsk vilayəti Azərbaycan ilə əməkdaşlığı genişləndirir
Moskva, 25 oktyabr, AZƏRTAC
Lipetskli sahibkarlar “Baku Build 2023” 28-ci Beynəlxalq İnşaat Sərgisi çərçivəsində əməkdaşlıq haqqinda ilkin razılaşmalar əldə ediblər.
AZƏRTAC Lipetsk vilayəti hökumətinin rəsmi saytına istinadla xəbər verir ki, tikinti sənayesi müəssisələri Xəzər İnşaat Həftəsi çərçivəsində Bakıda keçirilən “Baku Build 2023” sərgisində iştirak ediblər. Regionun ixracatçı şirkətlərinin sərgidə iştirakını Lipetsk vilayətinin “Mənim biznesim” İxracata dəstək mərkəzi təşkil edib.
Lipetsk nümayəndə heyətinin tərkibinə 10 müəssisə daxil idi. Bu müəssisələr öz məhsullarını səmərəli şəkildə nümayiş etdirməyə və əməkdaşlıq haqqında razılaşmalar əldə etməyə nail olublar.
“Lipetsk şirkətləri daxili bazarda özünü çox yaxşı təqdim edən keyfiyyətli məhsullar istehsal edir. Tədarük coğrafiyasını genişləndirmək lipetskli ixracatçılar üçün müntəzəm mərhələdir”, - deyə Lipetsk vilayətinin qubernatoru İqor Artamonov qeyd edib.
Fəridə Abdullayeva
AZƏRTAC-ın xüsusi müxbiri
Moskva