LİVANA DAİR ROMA KONFRANSINDA 18 ÖLKƏ İŞTİRAK EDƏCƏK

25.07.2006 [17:55]
Çap et
A⁺ A^-

Livanda böhranın nizama salınmasına dair iyulun 26-da keçiriləcək Roma konfransında 18 ölkə və beynəlxalq təşkilat iştirak edəcəkdir. AZƏRTAC İTAR-TASS-a istinadla xəbər verir ki, bunu İtaliya XİN-dən bildirmişlər.

Livanın Baş naziri Fuad əs-Sinyora, ABŞ dövlət katibi Kondoliza Rays, Rusiyanın və İtaliyanın xarici işlər nazirləri Sergey Lavrov və Massimo D’Alema, BMT-nin baş katibi Kofi Annan konfransa gələcəklər. Böyük Britaniya, Səudiyyə Ərəbistanı, Fransa, Misir, Avropa İttifaqı və Dünya Bankının nümayəndələri konfransda iştirak edəcəklərini təsdiqləmişlər. Tədbirə Almaniya, İordaniya, İspaniya, Kanada, Türkiyə və Finlandiya nümayəndələri də dəvət olunmuşlar. Gözlənildiyinə görə, konfransa NATO-nun baş katibi Yaap de Hoop Sxeffer də gələ bilər.

Konfransda Livan münaqişəsinə bilavasitə və ya bilvasitə cəlb olunmuş üç ölkə - İsrail, İran və Suriya iştirak etməyəcəklər.

Görüşdə NATO-nun himayəsilə Livanın cənubuna “aralayıcı qüvvələr” göndərilməsi məsələsi müzakirə olunacaqdır.