Liviya Baş nazirinin rəhbərlik etdiyi nümayəndə heyəti Türkiyəyə səfər edib
Ankara, 12 aprel, AZƏRTAC
Liviyanın Baş naziri Əbdülhəmid Dbeybəhin başçılıq etdiyi geniş tərkibdə nümayəndə heyəti Türkiyəyə rəsmi səfər edib. Heyətdə 14 nazir, 5 nazir müavini və digər rəsmi şəxslər, eləcə də Liviya Silahlı Qüvvələrinin Baş Qərargah rəisi, ordu generalı Muhammed El-Haddad təmsil olunurlar.
AZƏRTAC xəbər verir ki, Prezident Rəcəb Tayyib Ərdoğan Ankarada Baş nazir Əbdülhəmid Dbeybəh ilə görüşüb. Eyni zamanda heyətdə təmsil olunan nazirlər türkiyəli həmkarları ilə ayrı-ayrılıqda bir araya gəliblər.
Türkiyə-Liviya Yüksəksəviyyəli Əməkdaşlıq Şurasının ilk iclası keçirilib.
İki ölkə arasında beş əməkdaşlıq protokolu imzalanıb.
Prezident Rəcəb Tayyib Ərdoğan və Liviyanın Baş naziri Əbdülhəmid Dbeybəh birgə mətbuat konfransı keçiriblər.
Türkiyə dövlət başçısı diqqətə çatdırıb ki, Liviyanın ərazi bütövlüyünün və siyasi birliyinin qorunması, əhalinin rifahı ən mühüm hədəflərimizdəndir. Liviyaya hərtərəfli yardımlarını davam etdirən Türkiyə sabahdan etibarən COVID-19 infeksiyasına qarşı 150 min peyvənd çatdıracaq.
Liviyada davamlı atəşkəsə nail olmaq üçün Türkiyənin səylərinə görə təşəkkürünü ifadə edən Baş nazir Əbdülhəmid Dbeybəh diqqətə çatdırıb ki, digər məsələlərdə olduğu kimi enerji sahəsində də qarşılıqlı əməkdaşlıq etmək istəyirlər.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
