LİVİYA PROKURORU ƏCNƏBİ HƏKİMLƏRƏ ÖLÜM CƏZASI KƏSİLMƏSİNİ TƏLƏB EDİR
İttiham nümayəndəsi müttəhimlərə ölüm cəzası verilməsini bir daha tələb etmişdir.
Xatırladaq ki, Liviyanın Benqazi şəhərinin uşaq xəstəxanasında beynəlxalq xeyriyyə proqramı çərçivəsində işləyən beş bolqar tibb bacısı və fələstinli doktor burada müalicə olunan 426 uşağı İÇV-yə qəsdən yoluxdurmaqda şübhəli bilinərək, 1999-cu ilin axırlarında həbsə alınmışlar.
2000-ci ildə Benqazi şəhər məhkəməsi onların ən ağır cəzaya – güllələnməyə məhkum olunması barədə hökm çıxarmışdır.
Onların taleyi barədə danışıqlar ABŞ, Avropa İttifaqı və Bolqarıstan nümayəndələrinin iştirakı ilə bir neçə il davam etmiş və nəhayət, keçən ilin axırlarında Liviya hökuməti onların işinin əlavə təhqiqata göndərilməsinə icazə vermişdir. Yeni proses bu ilin mayında başlanmışdır.
Müttəhimlərin vəkili Benqazi səhiyyə sistemi nümayəndəsinin məhkəməyə dəvət olunmasını tələb etmişdir. Çünki o, əvvəllər mətbuatda bildirmişdi ki, əcnəbi tibb işçiləri hələ gəlməzdən əvvəl şəhərdə İÇV-yə yoluxma ilə bağlı təxminən 1 500 hadisə qeydə alınmışdır. Liviyalı uşaqların bu virusa yoluxması səbəblərinin müstəqil təhqiqini keçirmiş beynəlxalq ekspertlər qrupunun üzvləri də təsdiqləmişdilər ki, Benqazi xəstəxanasında İÇV əcnəbi həkimlərin oraya gəlməsindən xeyli əvvəl yayılmağa başlamışdı.
Benqazidə İÇV infeksiyası epidemiyasının aşkarlandığı vaxtdan ötən bir neçə ildə ixtisaslı tibbi yardım olmadığından 426 uşağın 50-si ölmüşdür.
Məhkəmənin növbəti iclası sentyabrın 5-nə təyin edilmişdir.
Bölmənin digər xəbərləri
