DÜNYA
Liviyanın neft sənayesi yenidən canlanır
Bakı, 21 sentyabr, AZƏRTAC
Dövlətə məxsus “National Oil Corp”un açıqlamasına görə, qanuni öhdəlikləri və hasilatı donduran fors-major vəziyyət sonlandırılacaq və müəyyən bölgələrdə neft hasilatı yenidən bərpa ediləcək.
AZƏRTAC xəbər verir ki, Liviya dövlətə məxsus enerji şirkətinin muzdlu əsgərlər tərəfindən tutulmayan neft yataqları və limanlarda ixracı bərpa edəcəyini açıqlamasından sonra ölkənin neft sənayesini yenidən canlanır.
“National Oil Corp” təhlükəsiz neft müəssisələrində fors-major vəziyyəti sonlandıraraq istehsala yenidən başlayacağını, lakin milislərin olduğu ərazilərdəki neft obyektlərinin bağlı qalacağını açıqlayıb.
Qeyd edək ki, 10 ildən çoxdur davam edən və bir çox qruplaşmanı əhatə edən Liviyadakı vətəndaş müharibəsində neft müəssisələri mühüm rol oynayırdı. General Xəlifə Haftarın enerji infrastrukturunu mühasirəyə almasından sonra ölkədə gündəlik xam neft istehsalı bu ilin yanvar ayında 1 milyon barreldən 100 min barrelə düşüb.
“Goldman Sachs”ın proqnozuna görə, cari ilin sonuna qədər ölkənin neft istehsalı sutkada 550 min barrelə, gələn ilin ortalarında isə gündəlik 1 milyon barrelə çata bilər.