London yaxınlığındakı təyyarə qəzasında dörd xarici vətəndaş həlak olub
London, 14 iyul, AZƏRTAC
İyulun 13-də London yaxınlığındakı Southend hava limanında baş verən təyyarə qəzası nəticəsində dörd nəfər həlak olub.
AZƏRTAC BBC-yə istinadla xəbər verir ki, Esseks polisinin hadisə ilə bağlı verdiyi açıqlamada ölənlərin hamısının xarici vətəndaşlar olduğu bildirilib.
Hadisə bazar günü yerli vaxtla saat 16:00-dan az əvvəl baş verib. 12 metrlik “Beech B200 Super King Air” tipli təyyarə havaya qalxdıqdan qısa müddət sonra partlayışla müşayiət olunan qəza baş verib. Şahidlər təyyarənin havaya qalxdıqdan dərhal sonra alışıb yanan bir top kimi partladığını bildiriblər.
Qəza nəticəsində təyyarədə olan iki pilot və iki sərnişin həyatını itirib. Həlak olan şəxslərin adları açıqlanmayıb. Hüquq-mühafizə orqanları onların şəxsiyyətlərini müəyyənləşdirmək üçün araşdırmaları davam etdirir.
Mülki Aviasiya İdarəsi qəzanın baş verdiyi ərazidə geniş hava məhdudiyyət zonası tətbiq edib. Hadisədən sonra Southend hava limanı bağlanıb və iyulun 14-ü üçün bütün reyslər başqa hava limanlarına yönləndirilib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
