“Los-Anceles-2028” Yay Olimpiya Oyunlarının proqramında dəyişikliklər edilib
Bakı, 11 aprel, AZƏRTAC
Beynəlxalq Olimpiya Komitəsi (IOC) 2028-ci ildə ABŞ-ın Los-Anceles şəhərində keçiriləcək Yay Olimpiya Oyunlarının proqramında dəyişikliklər edib.
AZƏRTAC IOC-un rəsmi saytına istinadən xəbər verir ki, dördilliyin ən mötəbər yarışında iştirak edəcək kişi futbol komandalarının sayı 16-dan 12-yə endirilib. Qadınların turnirində isə bu say 12-dən 16-ya çatdırılıb.
Boksda isə gender bərabərliyinə nail olmaq üçün qadınların yarışlarına əlavə çəki kateqoriyaları əlavə olunub. Kişilər 55, 60, 65, 70, 80, 90, +90, qadınlar isə 51, 54, 57, 60, 65, 70, 75 kiloqram çəki dərəcələrində medallar uğrunda mübarizə aparacaqlar. Bunadək kişi boksçular səkkiz, qadınlar beş çəkidə çıxış edirdilər.
Atletika, kamandan oxatma, qolf, bədii gimnastika, stolüstü tennis və avarçəkmə üzrə qarışıq formatlı yarışların sayı artırılıb.
Bundan başqa, 3x3 basketbol üzrə kişi və qadın komandalarının sayı 8-dən 12-yə yüksəldilib. Su polosu yarışlarına qadınlardan ibarət daha iki komanda əlavə olunub.
İdman dırmanmasında medallar ayrı-ayrı növlər - boulderinq və qayayadırmanma üzrə veriləcək.
Qeyd edək ki, “Los-Anceles-2028” Yay Olimpiya Oyunları iyulun 14-dən 30-dək keçiriləcək.
Bölmənin digər xəbərləri
