Mahnı Teatrında 20 Yanvar faciəsi qurbanlarının xatirəsinə həsr edilmiş konsert olub
Bakı, 19 yanvar, AZƏRTAC
Rəşid Behbudov adına Azərbaycan Dövlət Mahnı Teatrında 20 Yanvar faciəsi qurbanlarının xatirəsinə həsr edilmiş konsert olub.
1990-cı il yanvarın 20-də baş vermiş hadisələr ölkəmizin tarixinə “Qara Yanvar” adı ilə daxil olub. Həmin gün sovet qoşunlarının Azərbaycanın paytaxtı Bakıya yeridilməsi nəticəsində dinc sakinlər həlak olub. Hər il Azərbaycanda 20 Yanvar faciəsi qurbanlarının xatirəsinə həsr edilmiş rəsmi tədbirlər keçirilir.
AZƏRTAC xəbər verir ki, Azərbaycan Bəstəkarlar İttifaqı tərəfindən təşkil edilmiş konsertdə Dmitri Şostakoviçin “8 saylı simli kvartet”, “İohan Sebastyan Baxın “Fortepiano ilə orkestr üçün konsert” (II hissə) və “3 saylı süita”, Edvard Qriqin “Ozenin ölümü”, Qara Qarayevin “İldırımlı yollarla” baletindən “Laylay”, Semyuel Barberin “Adajio”, Sərdar Fərəcovun “Həzin səda”, Tomazo Albinoninin “Adajio” əsərləri səslənib.
Azərbaycanın qəhrəmancasına həlak olmuş oğullarının xatirəsinə ehtiram əlaməti olaraq Bakıdakı Dağüstü parkda Şəhidlər xiyabanı yaradılıb, 20 Yanvar faciəsinin qurbanları bu xiyabanda dəfn edilib. 20 Yanvar günü Azərbaycanda Ümumxalq Hüzn Günü elan olunub. Hər il həmin gün minlərlə paytaxt sakini Şəhidlər xiyabanına gəlib faciə qurbanlarının xatirəsini ehtiramla yad edir, onların şərəfinə ucaldılmış memorial önünə tər çiçəklər düzür.
Bölmənin digər xəbərləri
