Malayziyanın yeni Baş Naziri parlamentin sessiyasını iki ay müddətinə təxirə salıb
Tokio, 4 mart, AZƏRTAC
Malayziyanın yeni Baş Naziri Muhiddin Yassin parlamentin sessiyasını iki ay müddətinə təxirə salıb.
AZƏRTAC “The Jakarta Post” qəzetinə istinadla xəbər verir ki, bu barədə parlamentin spikeri martın 4-də məlumat verib.
Xatırladaq ki, Muhiddin Yassin 94 yaşlı Mahathir Məhəmməd Baş Nazir vəzifəsindən istefa verdikdən sonra bir həftə davam edən hakimiyyət böhranını aradan qaldırmaq üçün Kral Sultan Abdulla tərəfindən həmin vəzifəyə təyin edilib. Kral Muhiddin Yassinin parlamentin əksər üzvləri tərəfindən dəstəkləndiyini bildirərək bu addımı atdığını bəyan edib.
Lakin sabiq Baş Nazir Mahathir Məhəmməd əksəriyyətin onun namizədliyini dəstəklədiyini bildirib və parlamentin martın 9-da başlanacaq sessiyasında etimad səsverməsi məsələsini qaldıracağını deyib.
Parlamentin spikeri Mohammad Arif Yusif Baş Nazir Muhiddin Yassindən rəsmi məktub aldığını və bunun əsasında növbəti sessiyanın mayın 18-də başlanacağını elan edib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
