Malta yığmasının baş məşqçisi: Nəticə bizim üçün ürəkaçan oldu
Bakı, 15 oktyabr, AZƏRTAC
Komandam yaxşı çıxış etdi. Rəqib meydanında həm qol vurduq, həm də xal qazandıq. Üstəlik, uzaq səfərdən gəldiyimizi də unutmamalıyıq.
AZƏRTAC xəbər verir ki, bu sözləri UEFA Millətlər Liqasının qrup mərhələsi çərçivəsində oktyabrın 14-də Bakı Olimpiya Stadionunda Azərbaycan yığmasının qonağı olan Malta millisinin baş məşqçisi Raymond Farrucia oyundan sonra təşkil olunan mətbuat konfransında deyib.
R.Farrucia bildirib: “Heyətimiz gənclərdən qurulub, ancaq təcrübəli futbolçuların xidmətindən də faydalanırıq. Uzun müddətdən sonra oyun fəlsəfəmizi dəyişmişik. Rəqib haqda da xoş sözlər demək istərdim. Onlara qarşı çox yaxşı oynadıq. Rəqibimiz fantastik komandadır. Nəticə bizim üçün ürəkaçan oldu. Amma futbolçularımı qazandıqları 1 xaldan çox, göstərdikləri xarakterə görə təbrik edirəm”.
Qeyd edək ki, Azərbaycan-Malta oyunu 1:1 hesabı ilə başa çatıb.
Dörd turdan sonra Azərbaycan millisi 6 xalla qrupda ikinci pillədə qərarlaşıb. Kosovo 8 xalla birinci, Farer Adaları 4 xalla üçüncü, Malta isə 2 xalla sonuncu yerdədir.
Bölmənin digər xəbərləri
