Martda bankların aktivləri və balans kapitalı artıb
Bakı, 28 aprel, AZƏRTAC
Martın 31-nə fəaliyyətdə olan bankların cəmi aktivləri 54 milyard 855,6 milyon manat, cəmi öhdəlikləri 47 milyard 960,7 milyon manat, balans kapitalı 6 milyard 894,9 milyon manat olub.
AZƏRTAC Mərkəzi Banka istinadla xəbər verir ki, mart ayında bankların aktivləri 2,4 faiz (1 milyard 294 milyon manat), öhdəlikləri 2,6 faiz (1 milyard 212,3 milyon manat), balans kapitalı isə 1,2 faiz (81,7 milyon manat) artıb.
Hesabat ayında bankların kredit portfeli 1 faiz və ya 284,8 milyon manat artaraq 27 milyard 877,1 milyon manat olub. Kredit portfelinin strukturu: biznes kreditləri – 53,6 faiz (14 milyard 935 milyon manat); istehlak kreditləri – 30,9 faiz (8 milyard 603,6 milyon manat) və ipoteka kreditləri – 15,5 faiz (4 milyard 338,5 milyon manat).
Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 0,3 faiz bəndi azalaraq 1, 6 faiz təşkil edib.
Bankların öhdəliklərinin strukturunda ənənəvi olaraq depozit portfeli üstünlük təşkil edir – cəmi öhdəliklərin 77,8 faizi və ya 37 milyard 293,1 milyon manat.
Depozit portfelinin 60,5 faizi (22 milyard 549 milyon manat) hüquqi şəxslərin, 39,5 faizi (14 milyard 744,1 milyon manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir.
Bölmənin digər xəbərləri
