Media: İran Hörmüz boğazının açılmasına dair Omanla razılaşma əldə etməyə yaxındır
Bakı, 4 avqust, AZƏRTAC
“The New York Times” qəzetinin İran və ABŞ rəsmilərinə istinadla verdiyi məlumata görə, Tehran Hörmüz boğazından dəniz ticarət nəqliyyatını bərpa etmək üçün Maskat ilə razılığa gəlməyə yaxındır.
AZƏRTAC xəbər verir ki, qəzetin məlumatına görə, potensial razılaşmaya əsasən, Körfəzə daxil olan gəmilər İran tərəfindən idarə olunan və onun sahillərinə yaxın gəmiçilik kanalından keçəcək, xaricə gedən gəmilər isə Oman yaxınlığındakı kanaldan istifadə edəcək.
İran rəsmiləri “The New York Times” qəzetinə keçidə görə heç bir rüsum tutulmayacağını bildiriblər, lakin razılaşmaya naviqasiyanın ətraf mühitə təsirlərini, yük gəmiləri və tankerlərin təhlükəsizliyini, habelə işçi heyəti xərclərini əhatə edən “xidmət haqqı” daxil olacaq. Onlar əlavə ediblər ki, gəlir İran və Oman arasında bərabər şəkildə bölünəcək.
ABŞ rəsmisi isə qəzetə İranın məlumatının dəqiq olmadığını bildirib. O, boğazdan keçən hər hansı müvəqqəti gəmiçilik marşrutlarının Tehranın təsdiqini tələb etməyəcəyini və rüsumlardan azad olacağını deyib.
Məqaləyə görə, Pentaqonun bəzi yüksəkvəzifəli rəsmiləri təklif olunan razılaşmaya şübhə ilə yanaşır və bunun İrana güzəşt ola biləcəyindən narahatlıqlarını ifadə edirlər.
“The New York Times”, həmçinin qeyd edib ki, İranın bəzi rəsmiləri razılaşmanın nəzərdə tutulduğu kimi yerinə yetiriləcəyi və ABŞ hücumlarının növbəti mərhələsinin qarşısını alacağı ilə bağlı şübhələrini bildiriblər.
Bölmənin digər xəbərləri
