Media: Türkiyə şirkətləri yükləri Qara dəniz vasitəsilə göndərməkdən imtina edir
Ankara, 12 avqust, AZƏRTAC
Qara dənizdə artan gərginlik və gəmiçilik üçün təhdidlər türk ixracatçılarını Azərbaycan da daxil olmaqla alternativ təchizat yolları axtarmağa məcbur edir.
AZƏRTAC xəbər verir ki, “Milliyet” qəzeti bu barədə mülki gəmilərə dron hücumları fonunda dəniz gəmiçiliyi xərclərinin kəskin artmasına diqqət yetirərək yazıb.
“Türkiyə ilə Rusiyanın Novorossiysk limanı arasındakı marşrutda fəaliyyət göstərən gəmiçilik şirkətləri “müharibə riski ilə bağlı əlavə haqq” (WRS) tətbiq etməyə başlayıb. Əlavə ödənişlər səbəbindən konteyner daşımalarının artan qiyməti bəzi şirkətləri əməliyyatları dayandırmağa məcbur edir, digərləri isə gəmiçilik marşrutlarını dəyişir”, - deyə qəzet yazır. Materialda Qara dənizdə əlavə gəmiçilik xərclərinin iyirmi fut ekvivalent vahid (TEU) üçün 1000 dollara qədər artdığı və bunun adi haldan iki-üç dəfə çox olduğu qeyd edilir.
Nəşr vurğulayır ki, bir çox şirkətin sahibləri yükləri Gürcüstan, Azərbaycan və İran vasitəsilə quru yolu ilə yönləndirir, bəziləri isə dəniz yolu ilə Cənub-Şərqi Asiya ölkələrinə göndərir. Bir neçə şirkət isə ixrac əməliyyatlarını tamamilə dayandırıb.
Qeyd etmək lazımdır ki, son həftələrdə Qara dənizdə Türkiyənin bir neçə gəmisinə hücum edilib.
Bölmənin digər xəbərləri
