CƏMİYYƏT
Məhəmməd Cəfər Müntəziri: İran və Azərbaycanın prokurorluq orqanlarının əməkdaşlığı günün tələbidir
Tehran, 30 avqust, AZƏRTAC
İran və Azərbaycan yaxın qonşu və dost dövlətlərdir. Hər iki xalq müştərək tarixə, dinə və milli-mənəvi dəyərlərə malikdir. Bu amillər digər sahələrdə olduğu kimi, hüquq sahəsində də əməkdaşlıq əlaqələrinin möhkəmlənməsini tələb edir.
AZƏRTAC xəbər verir ki, bu sözləri İranın Baş prokuroru Məhəmməd Cəfər Müntəziri Azərbaycanın Baş prokuroru Kamran Əliyevlə görüşdə deyib. O bildirib ki, hər iki ölkənin rəhbərlərinin siyasi iradəsi ilə qarşılıqlı əlaqələr yüksələn xətlə inkişaf edir. Bəzi adamlar münasibətlərin yaxşı olmasından sui-istifadə hallarına yol verərək qanundankənar işlər görürlər. Bu kimi halların qarşısını almaq üçün prokurorluq orqanlarının qarşılıqlı faydalı əməkdaşlıq əlaqələri qurması günün tələbidir.
İranın Baş prokuroru nəzərə çatdırıb ki, sərhəddə, gömrükdə yaranan problemləri hüquqi müstəvidə həll etmək üçün əməkdaşlığa, təcrübə və informasiya mübadiləsinə ehtiyac var. Məhkumların dəyişdirilməsi (ekstradisiyası) məsələsinə toxunan M.C.Müntəziri bildirib ki, istintaqı başa çatan məhkumların ekstradisiyası məsələsini müzakirə etmək olar.
O, İranın Əfqanıstanla böyük sərhədə malik olduğunu və bu ölkədən narkotik vasitələrin keçirildiyini bildirib. Qeyd edib ki, İran narkotik vasitələrin qaçaqmalçılığına qarşı ciddi mübarizə aparır və bu məsələdə Azərbaycanla daha sıx əməkdaşlığa hazırdır.
AZƏRTAC-ın xüsusi müxbiri
Tehran