Mənzil İnşaatı Dövlət Agentliyinin yaradılmasından 7 il ötür
Bakı, 11 aprel, AZƏRTAC
Azərbaycan hökumətinin sosial siyasətinin əsas məqsədlərindən biri də vətəndaşların mənzil-məişət şəraitinin yaxşılaşdırılmasıdır. Ölkə əhalisinin sayının artması Azərbaycan vətəndaşlarının mənzilə olan tələbatının təmin olunması məsələsini daha da aktual edir. Xüsusilə az və orta təminatlı vətəndaşların, gənc ailələrin mənzil probleminin həll edilməsi prioritet vəzifə kimi müəyyən olunub. Bu sahədə həyata keçirilən islahatların davamı olaraq dövlətimizin başçısının 2016-cı il 11 aprel tarixli Fərmanı ilə Azərbaycan Respublikasının Prezidenti yanında Mənzil İnşaatı Dövlət Agentliyi yaradıldı. Bununla yanaşı, ölkədə çoxmənzilli yaşayış binalarının tikintisinə rəvac vermək, vətəndaşların güzəştlə mənzillər əldə etmələrinə şərait yaratmaq, çoxmənzilli yaşayış binalarının tikintisi üçün ayrılan maliyyə vəsaitlərindən səmərəli istifadəni təşkil və təmin etmək məqsədilə Mənzil İnşaatı Dövlət Agentliyinin tabeliyində “MİDA” Məhdud Məsuliyyətli Cəmiyyəti yaradıldı.
AZƏRTAC xəbər verir ki, Mənzil İnşaatı Dövlət Agentliyi ölkə vətəndaşlarının yaşayış şəraitinin yaxşılaşdırılması istiqamətində işini müasir qlobal tendensiyaları və bu sahədə qabaqcıl dünya təcrübəsini nəzərə alaraq təşkil edir. Dünyanın bir çox ölkəsi əhalinin mənzilə və yaşayış şəraitinin yaxşılaşdırılmasına artan tələbatının ödənilməsi, sosial mənzillərin tikintisi sahəsində geniş təcrübəyə malikdir. Ötən müddət ərzində Agentlik Almaniya, Sinqapur, Türkiyə, Rusiya, Braziliya, Meksika, Mərakeş və bir çox digər ölkələrin təcrübəsinin təhlilini aparıb, bəzi xarici tərəfdaşlarla ikitərəfli əməkdaşlıq və təcrübə mübadiləsi məqsədilə əlaqələr qurulub. Eyni zamanda, Agentliyin fəaliyyətinin effektiv təşkil edilməsi, mənzil tikintisi sahəsində müasir standartların öyrənilməsi və tətbiq edilməsi məqsədilə beynəlxalq təşkilatlarla əməkdaşlıq imkanlarının araşdırılması işinə də başlanılıb. Azərbaycanda da bu sistemin davamlı olması, iqtisadi risklərə dözümlü təşkil olunması məqsədilə sosial mənzillərin inşası prosesinin maliyyələşdirilməsi mexanizminin öyrənilməsi üçün artıq bir neçə beynəlxalq maliyyə institutu və iri maliyyə şirkətləri ilə ikitərəfli münasibətlərin qurulmasına start verilib. Beynəlxalq təcrübənin daha yaxından öyrənilməsi, müvafiq xarici təşkilatlarla və investorlarla əməkdaşlığın qurulması və genişləndirilməsi Agentliyin əsas prioritetlərindən biridir.
Mənzil İnşaatı Dövlət Agentliyi fəaliyyətə başladığı gündən indiyədək 8 layihə reallaşdırıb. Bu layihələrdən artıq 4-də tikinti işləri tam başa çatıb. Gəncə Yaşayış Kompleksində artıq 7731 mənzil artıq inşa edilib. Bununla yanaşı, 13 sosial obyekt istifadəyə verilib. Bunlardan 4 ümumtəhsil məktəbi, 7-si bağça, 1 tibb mərkəzi və bir də ticarət mərkəzidir. Yasamal Yaşayış Kompleksi, Yasamal Yaşayış Kompleksinin ikinci mərhələsi, Hövsan Yaşayış Kompleksinin birinci mərhələsi və Sumqayıt şəhərində inşa olunan mənzillər güzəştli mənzillərdir.
Agentliyin növbəti layihəsi - Lənkəran Yaşayış Kompleksi Akademik Zərifə Əliyeva küçəsi, 303 ünvanında yerləşir. Yaşayış kompleksinin ümumi sahəsi 1,5 hektar təşkil edir. Yaşayış Kompleksi doqquzmərtəbəli olmaqla 5 binadan ibarətdir. Bu binalarda ümumilikdə 240 mənzil olacaq.
İşğaldan azad olunmuş Füzuli şəhərində də yeni yaşayış məhəlləsinin salınması istiqamətində Agentlik tərəfindən tikinti işləri həyata keçirilir. Füzuli Yaşayış Kompleksinin ümumi sahəsi 8,9 hektar təşkil edir. Yaşayış kompleksi 2 dörd-beşmərtəbəli, 4 beşmərtəbəli, 4 altımərtəbəli, 8 dörd-beşmərtəbəli, 2 dördmərtəbəli, 12 beşmərtəbəli, 2 beş-altımərtəbəli, 4 altı-yeddimərtəbəli olmaqla 38 yaşayış binasından ibarətdir. Bu binalarda ümumilikdə 846 mənzil olacaq. Tikinti işlərinin 2023-cü ilin sonunadək başa çatdırılması nəzərdə tutulur.
Digər yaşayış kompleksi Cəbrayıl şəhərində tikiləcək Cəbrayıl Yaşayış Kompleksidir, ümumi sahəsi 7,87 hektar təşkil edəcək. Kompleks 7 beşmərtəbəli və 26 dördmərtəbəli olmaqla, 33 yaşayış binasından ibarətdir. Bu binalarda ümumilikdə 712 mənzil olacaq. Kompleks 6 kvartaldan ibarət olacaq.
Müasir Azərbaycan Respublikası 1991-ci ildə dövlət müstəqilliyini bərpa etdiyi gündən ötən müddət ərzində mürəkkəb və eyni zamanda uğurlu inkişaf yolu keçib. Son dövrlər dünyada baş verən hadisələr, o cümlədən siyasi və iqtisadi böhranlar Azərbaycana da müəyyən qədər təsir etsə də, müstəqillik dövründə əsası Ümummilli Lider Heydər Əliyev tərəfindən qoyulmuş genişmiqyaslı islahatlar prosesi ölkədə davamlı sosial-iqtisadi inkişafın təmin olunmasına xidmət edib. Bu gün Azərbaycan Respublikasının Prezidenti İlham Əliyev tərəfindən həyata keçirilən uzaqgörən dövlət siyasəti sayəsində ölkəmizin dayanıqlı inkişafı təmin olunmaqla yanaşı, vətəndaşların bir çox sosial problemləri öz həllini tapıb, əhalinin sosial müdafiəsinin gücləndirliməsi və rifahının daha da yüksəldilməsi istiqamətində mütərəqqi addımlar atılıb. Bu məsələ Azərbaycan Respublikası Prezidentinin 2012-ci il 29 dekabr tarixli Fərmanı ilə təsdiq edilmiş “Azərbaycan 2020: gələcəyə baxış” İnkişaf Konsepsiyasında da öz əksini tapıb. Konsepsiya ölkə həyatının bütün sahələrində inkişaf siyasətinin əsas strateji hədəflərini özündə ehtiva edir və onun həyata keçirilməsi məqsədli dövlət proqramları vasitəsilə gerçəkləşdirilir. Bu sənəddə strateji xətt olaraq ön plana çəkilən əsas məqamlardan biri də ölkə əhalisi üçün keyfiyyətli sosial xidmətlər hazırlamaq və bu xidmətlərin müxtəlif sosial qruplar, o cümlədən aztəminatlı ailələr üçün əlçatanlığını təmin etməkdir. Bununla bərabər, əhalinin etibarlı sosial müdafiəsinin təmin edilməsi məqsədilə görülən işlərin davam etdirilməsi və genişləndirilməsi də əsas hədəflərdən biri kimi müəyyən olunub.
Bölmənin digər xəbərləri
