SİYASƏT
Məqsədimiz Litva azərbaycanlılarını birləşdirməkdir
Vilnüs, 6 iyun (AZƏRTAC). Litvada Sadıq Nurullayevin rəhbərliyi ilə “Günəş” Azərbaycanlılar Assosiasiyası fəaliyyət göstərir. Assosiasiya 2006-ci ildə Litva azərbaycanlılarının qurultayı zamanı yaradılmışdır.
S.Nurullayev “Azeri.It” saytında müsahibəsində qeyd etmişdir ki, Litvada 807 azərbaycanlı ailə yaşayır. Hər il assosiasiyasının sıralarına 3-10 ailə qatılır. O demişdir: “Məqsədimiz hamını bir araya gətirməkdir”.
Azərbaycanlılar Litva iqtisadiyyatının inkişafına öz töhfəsini verirlər. Axı, onların bir çoxu iş adamıdır. Həmvətənlərimizdən söz açan S.Nurullayev Dadaşov qardaşlarını, Ruslan Zeynalovu, Zemfira Teymurovanı, Kəmalə Zülfiyevanı fərqləndirərək demişdir: “Ən müxtəlif peşələrin nümayəndələri - alimlər, iqtisadçılar, hüquqşünaslar, həkimlər, fermerlər vardır. Bizdə Litva çempionatlarında müvəffəqiyyətlə çıxış edən və onu xarici ölkələrdə yarışlarda təmsil edən idmançılar vardır. Ən sevindirici məsələ budur ki, böyük ümidlər bəslədiyimiz, Litvanın inkişafına öz töhfəsini verəcək və artıq verməkdə olan gənclərimiz yetişir. Özü də onların 75 faizinin ali təhsili vardır”.
S.Nurullayev iki xalqın oxşarlığından danışaraq qeyd etmişdir ki, azərbaycanlıları və litvalıları ilk növbədə vicdanlı və son dərəcə tolerant olmaları birləşdirir. O demişdir: “Azərbaycanlılar çox sülhsevərdir. Buna görə də heç vaxt heç kimlə problem yaranmır. Azərbaycanlıların çoxu Litva dilində yaxşı danışır. Buna görə də dil problemi yoxdur. Son vaxtlar çoxlu litvalı Azərbaycanda dost qazanmış, ailəvi dostluq edir və deməli, bir-birinə daha yaxından bələd olurlar”. Litva rəhbərliyi də bu sahədə çox iş görmüşdür. Son vaxtlar bu Baltik ölkəsinin müxtəlif nümayəndə heyətlərinin Azərbaycana səfərləri təşkil edilmişdir. Litvalılar həmin səfərlər zamanı ölkəmizin dinamik inkişafının şahidi olmuşlar.
S.Nurullayev assosiasiyanın fəaliyyətindən danışaraq vurğulamışdır ki, “Günəş” Azərbaycanın Litvadakı səfirliyi ilə birlikdə Azərbaycan tarixinin əlamətdar günlərini və milli bayramları mütəmadi qeyd edir. Belə tədbirlərin qonaqları Litva cəmiyyətinin görkəmli nümayəndələri, mədəniyyət xadimləri, ölkədə akkreditə olunmuş diplomatlar, deputatlar, nazirlər olurlar.
Gündəlik səviyyədə əlaqələrə gəldikdə isə onlar da çox genişdir. Müştərək Litva-Azərbaycan müəssisələri fəaliyyət göstərir. Onların sayı ilbəil artır. Belə qarşılıqlı münasibətlərin nəticələri son vaxtlar daha nəzərəçarpacaqdır. Əgər əvvəllər Litvadan Azərbaycana ayda 20-dək adam gəlirdisə, indi onların sayı 200-dən çoxdur. Bunu bir çox mənada şərtləndirən cəhət budur ki, Azərbaycanın iqtisadiyyatı dünyanın ən sürətlə inkişaf edən iqtisadiyyatlarından biridir. “Günəş”in başçısı demişdir: “Səmimi dəstəyə görə Litva azərbaycanlıları adından Litva Prezidentinə, deputatlarına və hökumətinə minnətdarlıq etmək istəyirəm. Ümidvarıq ki, bizim bütün birgə planlarımız həyata keçəcəkdir”.
Nigar Hüseynova
AZƏRTAC-ın xüsusi müxbiri
Vilnüs