Mərakeşdə Əhmədiyyə Cəbrayılovun 100 illiyinə həsr olunmuş tədbir keçirilib
Rabat, 23 dekabr, AZƏRTAC
Azərbaycan Respublikasının Mərakeş Krallığındakı səfirliyi, Mərakeşin keçmiş Müqavimət Hərəkatı iştirakçıları və Azadlıq Ordusunun üzvlərinin Ali Komissarlığı və Azərbaycan-Mərakeş dostluq qrupunun birgə təşkilatçılığı ilə İkinci Dünya müharibəsinin iştirakçısı, əfsanəvi partizan, Fransa Müqavimət Hərəkatının görkəmli nümayəndələrindən biri Əhmədiyyə Mikayıl oğlu Cəbrayılovun 100 illiyinə həsr olunmuş tədbir keçirilib.
AZƏRTAC xəbər verir ki, Mərakeşin keçmiş Müqavimət Hərəkatı iştirakçıları və Azadlıq Ordusunun üzvlərinin Ali Komissarlığının mənzil-qərargahında təşkil olunan tədbirdən əvvəl Ali Komissarlıqda Əhmədiyyə Cəbrayılova və Mərakeşin Müqavimət Hərəkatı iştirakçılarına həsr olunmuş fotosərgiyə və videoçarxa baxış keçirilib.
Mərakeşin keçmiş Müqavimət Hərəkatı iştirakçılarının və Azadlıq Ordusunun ali komissarı, Ümumdünya Veteranlar Şurasının həmsədri Mustafa əl-Ktiri tədbirdə çıxış edərək ölkələrimiz arasındakı dostluq əlaqələrinə toxunub, münasibətlərimizin son illər ərzində daha da genişləndiyini, rəhbərlik etdiyi təşkilatla Azərbaycanın Rabatdakı səfirliyi arasında mövcud əməkdaşlığı məmnunluqla vurğulayıb. Ali komissar Mərakeşin mərhum Kralı V Məhəmmədin Mərakeş Krallığında, Azərbaycanın ümummilli lideri Heydər Əliyevin isə Azərbaycandakı dövlət quruculuğunda, hər iki liderin xalqlarının müqəddəratının müəyyən edilməsində misilsiz xidmətlərinin olduğunu vurğulayıb, bəşəriyyətin xilası uğrunda mübarizə aparmış Müqavimət Hərəkatı iştirakçılarının xatirəsinə ölkəmizdə göstərilən diqqəti yüksək qiymətləndirib.
Səfir Oktay Qurbanov Azərbaycan xalqının görkəmli şəxsiyyətlərinin və qəhrəman oğullarının xatirəsinə ölkə rəhbərliyi tərəfindən göstərilən hörmət və ehtiramdan bəhs edib, Azərbaycan Prezidenti İlham Əliyevin əfsanəvi partizan Əhmədiyyə Cəbrayılovun 100 illiyinin keçirilməsi barədə Sərəncam imzalandığını bildirib.
Diplomat tədbir iştirakçılarına Ə.Cəbrayılovun keşməkeşli, mübariz həyat yolu, Fransa Müqavimət Hərəkatında və dinc quruculuq illərindəki fəaliyyəti barədə geniş məlumat verib. Qeyd olunub ki, 1941-ci ildə müharibənin başlanması ilə ölkənin müdafiəsi üçün könüllü surətdə cəbhəyə yollanan Ə.Cəbrayılov daha sonralar Fransa Müqavimət Hərəkatında fəal iştirak edib. Onun yüksək bacarıqla həyata keçirdiyi çoxsaylı kəşfiyyat əməliyyatlarındakı şücaətləri layiqincə qiymətləndirilib. Fransanın orden və medalları ilə təltif edilmiş həmvətənimizin xatirəsi, eyni zamanda, Müqavimət Hərəkatı iştirakçıları sırasında əbədiləşdirilib.
Səfir bildirib ki, Ə.Cəbrayılovun oğlu Mikayıl Cəbrayılov Azərbaycanın suverenliyi və ərazi bütövlüyü uğrunda gedən döyüşlərdə qəhrəmanlıq göstərərək şəhid olub və o, Azərbaycanın Milli Qəhrəmanı adına layiq görülüb.
Sonda O.Qurbanov bu tədbirin Azərbaycan xalqı üçün əlamətdar bir dövrə - 30 ilə yaxın bir müddətdə Ermənistanın işğalı altında olan torpaqlarımızın geri qaytarılması, Azərbaycanın Ermənistan üzərində tarixi şanlı Qələbəsi ilinə təsadüf etdiyini vurğulayaraq, hər ikisinin - ata və oğulun ruhlarının şad olduğunu qeyd edib.
Daha sonra çıxış edən Azərbaycan-Mərakeş dostluq qrupunun katibi M.Fəqiri Müqavimət hərəkatlarında iştirak etmiş azərbaycanlılar və mərakeşlilər barədə məlumat verib.
Nigar Cəfərli
AZƏRTAC-ın xüsusi müxbiri
Rabat
Bölmənin digər xəbərləri
