DÜNYA
Mərkəzi Asiya dövlətləri Əfqanıstanla əməkdaşlıq səylərini birləşdirəcək
Bakı, 27 noyabr, AZƏRTAC
Noyabrın 26-da Daşkənddə Özbəkistan Xarici İşlər Nazirliyinin təşkilatçılığı və BMT-nin Mərkəzi Asiya üçün Preventiv Diplomatiya üzrə Regional Mərkəzinin (UNRCCA) yardımı ilə Mərkəzi Asiya ölkələri xarici işlər nazirlərinin müavinləri səviyyəsində növbəti - 14-cü görüş keçirilib.
AZƏRTAC Özbəkistan mediasına istinadla xəbər verir ki, iclas iştirakçıları müzakirələr zamanı Mərkəzi Asiya dövlətlərinin xarici siyasətinin regional əməkdaşlığın gücləndirilməsinə yönəlmiş prioritetləri barədə yekdil fikirlər ifadə ediblər. Tədbirdə, həmçinin ticarət və iqtisadiyyat, nəqliyyat və logistika marşrutları, su, enerji və iqlim məsələləri ilə bağlı regional əməkdaşlığın konkret istiqamətləri müzakirə edilib.
Əfqanıstanla əməkdaşlıqla bağlı Mərkəzi Asiya ölkələrinin səylərinin birləşdirilməsi ilə bağlı ayrıca müzakirə aparılıb.
Tədbir zamanı Preventiv Diplomatiya Akademiyasının məzunları beynəlxalq gündəmdə olan məsələlər, o cümlədən sosial məsələlərlə bağlı Mərkəzi Asiya dövlətlərinin hökumətlərinə müraciət ediblər.
