MƏRKƏZİ SEÇKİ KOMİSSİYASININ SƏDRİ MƏZAHİR PƏNAHOVUN MƏTBUAT KONFRANSI
MSK sədri əvvəlcə KİV nümayəndələri qarşısında çıxış edərək dedi:
- Biz deyə bilərik ki, Mərkəzi Seçki Komissiyası nəzdində olan “Seçkilər” İnformasiya Mərkəzi öz işinin öhdəsindən tamamilə gəldi və artıq demək olar, ölkə üzrə seçkilərin ilkin nəticələri ilə bağlı məlumatların hamısı maraqlı tərəflərin, ümumiyyətlə, ictimaiyyətin diqqətinə vaxtında çatdırıldı. Hətta mən deyə bilərəm ki, beynəlxalq qurumların nümayəndə heyətlərinin üzvləri çox təəccüb edirdilər ki, Azərbaycanda qısa müddətdə məntəqələr səviyyəsində ilkin nəticələrin internet saytına qoyulması təmin edilmişdir. Hesab edirəm ki, bu, bizim İnformasiya mərkəzinin kütləvi informasiya vasitələrinin nümayəndələri ilə birlikdə seçkilərə göstərdiyi ən mühüm xidmət oldu.
Ümumi nəticələrə gəldikdə isə, yəqin siz bilirsiniz. Azərbaycan seçicilərinin təqribən 46,8 faizi səsvermədə iştirak etmişdir. 125 dairə üzrə ilkin məlumatlara görə, ən çox səs toplamış namizədlərin adlarını çəkməyə lüzum yoxdur. Kütləvi informasiya vasitələrinin nümayəndələri, bütün telekanallar gün ərzində ictimaiyyəti bununla tanış edir. Amma onu deyə bilərəm ki, Mərkəzi Seçki Komissiyasının üzvləri dünən və bu gün daxil olan müraciətləri araşdırmaqla məşğul olmuşlar. İndi bizim vəzifəmiz təcili olaraq yerlərdən rəsmi protokolları qəbul etmək və daxil olmuş müraciətlərə baxaraq, qanunun tələblərinə uyğun qərar çıxarmaqdan ibarətdir.
Mən dünən sizə məlumat vermişdim ki, MSK-ya 71 şikayət daxil olmuşdu. Bu gün daha 45 müraciət daxil olubdur. Onların müəyyən hissəsi yenə də icra strukturlarının müdaxiləsi, dairə komissiyalarının bu və ya digər formada bu məsələlərə özünün səlahiyyəti çərçivəsində lazımi qiyməti verməməsi və namizədlərin nəticələrlə razı olmamasını bildirməsi barədədir. MSK-ya daxil olmuş şikayətlərə baxılması nəticəsində bizdə belə şübhə yaranmışdır ki, 10-na yaxın dairədə nəticələr, ola bilsin, həqiqətə uyğun deyil, reallığı əks etdirmir. Eyni zamanda, əlavə daxil olacaq şikayətlərə baxıldıqdan sonra, ola bilsin, bu dairə bir az da genişlənsin.
Müraciətlər arasında hələ indiyə qədər nəticələri məlum olmayan dairələr barədə də fikirlər var. Təbii ki, bu, sizin də, ictimaiyyətin də diqqətini cəlb edir. Burada gün ərzində daxil olan bütün məlumatları qəbul edirsiniz. Amma müyyən dairələr var ki, oradan məlumatlar daxil olmur. Yaxud məlumatlar daxil olmuş dairələr var ki, oradan MSK-ya daxil olmuş müraciətlər tamamilə başqa bir mənzərəni əks etdirir. Amma “Seçkilər” İnformasiya Mərkəzində, MSK-da, bizim mətbuat mərkəzində olan mənzərə bir az bundan fərqlənir.
Ümumiyyətlə, MSK-nın fikri belədir ki, bütövlükdə seçkilər şəffaf, demokratik tələblərə cavab verən və hərtərəfli şəraitin yaradıldığı bir atmosferdə keçmişdir. Mərkəzi Seçki Komissiyası hesab edirik ki, müəyyən yerlərdə qanun pozuntuları baş vermişdir. Biz öz mövqeyimizdən, səlahiyyətimizdən istifadə edərək çalışacağıq ki, bütün dairə və məntəqələrdə qanunun tələblərinə uyğun olaraq həqiqəti ortaya çıxaraq və düzgün nəticələri aşkarlayaq. Söz verirəm ki, MSK bu işin öhdəsindən gələcəkdir.
Beynəlxalq qurumların rəsmi nümayəndə heyətləri Azərbaycandadırlar. Onların arasında rəsmi missiyanı yerinə yetirənlər var, müstəqil qruplar var. Bundan əlavə, ictimaiyyətin müxtəlif təbəqələrini təmsil edən yerli müşahidəçilər var. Əgər onların hamısının fikrini cəmləşdirsək, burada da baş vermiş qanun pozuntularına diqqət yetirilir. Onu demək istəyirəm ki, ümumi ənənə belədir, seçkiləri müşahidə etmək arzusuna düşən həm fərdlərin, həm də beynəlxalq qurumların nümayəndələrinin vəzifə borcudur ki, əsasən çatışmazlıq üzərində dayansınlar. Yəni çatışmazlıqları qeyd etmək, üzə çıxarmaq müşahidə aparan qurumların bir növ vəzifə borcudur. Onların iştirakı bundan ibarətdir, onlar tərifləməkdən ötrü gəlmirlər. Ona görə sizdən xahiş edirəm, müəyyən qurumların hansısa sözlərini çox da şişirtməyin. Bu, dünyanın hər yerində belədir, elə siz özünüz də, əgər nəyisə yoxlamağa gedirsinizsə, yaxşı şey görəndə, zahirən ona o qədər əhəmiyyət vermirsiniz.
Amma çatışmayan cəhətləri ortaya çıxarmaq üçün gedirsiniz. Ona görə bəzən ictimaiyyəti çaşdırmağa çalışırlar.
Beynəlxalq qurumların Azərbaycanla əməkdaşlığı davam edir. Azərbaycan ictimaiyyətinin həm ümumi demokratik dəyərlərə münasibəti, həm də seçkilərin, ümumiyyətlə, demokratik cəmiyyət üçün nə kimi əhəmiyyətə malik olduğunu hiss etməsi beynəlxalq ictimaiyyətə bəllidir. Mən sizə tam səmimiyyətlə deyirəm, son on ildə bu istiqamətdə gördüyümüz işləri Azərbaycana ən qərəzli münasibəti olan qurumların nümayəndələri də bizimlə görüşlərində vurğulayırlar.
Nəhayət, mən bir məqamı da sizin diqqətinizə çatdırmaq istəyirəm. Bilirsiniz ki, Azərbaycanda keçirilən seçkiləri exit-poll qrupları izləyirdilər. Ən azı 65-dən yuxarı dairədə exit-poll keçirilibdir. Bu, 50 faizdən yuxarıdır və beynəlxalq standartlara görə çox böyük rəqəmdir. Siz exit-pollun nəticələri ilə tanışsınız. Bilmirəm niyə, amma hamı deyirdi ki, əsas exit-pollu PA Government keçirəcəkdir. Mən ilkin nəticələrə baxdım, PA Governmentin nəticələri ilə indi sizin əlinizdə olan nəticələr 85 faiz üst-üstə düşür. İndi mən sizdən soruşuram: bir halda ki, səsvermənin nəticəsi sizin dediyiniz kimi, dünyanın ən nüfuzlu exit-poll qrupunun keçirdiyi sorğularla 85 faiz üst-üstə düşürsə, onda necə demək olar ki, bu seçkilər heç bir standarta uyğun gəlmir?! Ona görə gəlin, həqiqətin gözünə həmişə dik baxaq. Çatışmazlıqlarımız olub, bunu həmişə deyirəm. Nailiyyətlərimiz onsuz da bizimdir, bizim həyatımızı bəzəyir və bunu heç kəs dana bilməz.
MSK-nın informasiya mərkəzinin fəaliyyətini yüksək qiymətləndirərkən xatırlatmaq istəyirəm ki, bu mərkəzin yaradılması ümummilli liderimiz Heydər Əliyevin təşəbbüsü idi. Onda narahatlıq var idi ki, necə ola bilər ki, bütün informasiyaları ictimaiyyətə açıq çatdırmaq olmasın. Heç kəs inanmırdı. Amma 2000-ci ildə Azərbaycan bu məsələyə başlayanda keçmiş sovet məkanında ancaq Rusiyada buna uyğun sistem var idi. Hətta indinin özündə belə, nəinki keçmiş sovet məkanında, Avropa ölkələrinin hansında belə bir sistem var?!
Sonra MSK-nın sədri yerli və xarici jurnalistlərin suallarına ətraflı cavab verdi.
Bölmənin digər xəbərləri
