MİLLİ MƏCLİSİN HÜQUQ SİYASƏTİ VƏ DÖVLƏT QURUCULUĞU MƏSƏLƏLƏRİ DAİMİ KOMİSSİYASININ İCLASI OLMUŞDUR

26.12.2005 [20:19]
Çap et
A⁺ A^-

AZƏRTAC xəbər verir ki, Milli Məclisin Hüquq siyasəti və dövlət quruculuğu məsələləri daimi komissiyasının dekabrın 26-da keçirilən iclasında “Azərbaycan Respublikasının bəzi qanunvericilik aktlarına dəyişikliklər və əlavələr edilməsi barədə”, “Hüquqi şəxslərin dövlət qeydiyyatı və dövlət reyestri haqqında” Qanuna dəyişikliklər edilməsi barədə”, “Azərbaycan Respublikasının Cinayət Məcəlləsinə əlavə və dəyişikliklər edilməsi haqqında” və digər qanun layihələri müzakirə olunmuşdur.

Komissiyanın sədri Əli Hüseynov demişdir ki, edilən dəyişikliklər qanunların daha da təkmilləşməsinə, onlardakı bəzi boşluqların və çatışmazlıqların aradan qaldırılmasına xidmət edir.

Ədliyyə Nazirliyinin idarə rəisi Azər Cəfərov birinci məsələ ilə bağlı məlumat verərək demişdir ki, “Məhkəmələr və hakimlər haqqında” və “Məhkəmə-Hüquq Şurası haqqında” qanunlara təklif olunan dəyişikliklərdə respublikanın regionlarında apellyasiya məhkəmələrinin, Naxçıvan Muxtar Respublikasında Ağır Cinayətlərə dair İşlər üzrə Məhkəmənin yaradılması, Ali Məhkəminin Plenumunda qərarların qəbulu prosedurunun təkmilləşdirilməsi və digər məsələlər əksini tapmışdır.

Sonra digər məsələlərə baxılmış, deputatlar müzakirə olunan qanun layihələri ilə əlaqədar rəy və təkliflərini bildirmişlər.

Sonda layihələr təsdiqlənmək üçün Milli Məclisin müzakirəsinə tövsiyə olunmuşdur.