Bakı, 14 iyun, AZƏRTAC

İyunun 14-də Milli Məclisin növbədənkənar iclası keçirilib.

AZƏRTAC xəbər verir ki, iclas Azərbaycanın dövlət himninin səsləndirilməsi ilə başlayıb.

Milli Məclisin sədri Oqtay Əsədov gündəliyə 28 məsələnin daxil olduğunu bildirib. Sonra müzakirələr başlayıb.

“Kənd təsərrüfatı kooperasiyası haqqında” qanun layihəsini üçüncü oxunuşda təqdim edən aqrar siyasət komitəsinin sədri Eldar İbrahimov bildirib ki, ikinci oxunuş zamanı parlamentdə səsləndirilən irad və təkliflər işçi qrup tərəfindən diqqətlə araşdırılıb, nəzərə alınıb. Qeyd edib ki, bu qanunun tətbiqi, ölkədə torpaq sahiblərinin könüllü birliyinin yaradılması aqrar bölmədə islahatların yeni mərhələsinə təkan verəcək. Parlament qanunu üçüncü oxunuşda qəbul edib.

Sonra elm və təhsil komitəsinin sədri İsa Həbibbəyli üçüncü oxunuşda müzakirəyə çıxarılmış “Elm haqqında” qanun layihəsi üzərində aparılmış iş barədə məlumat verib. Deputatların əvvəlki müzakirələrdə dəyərli təkliflər səsləndirdiyini, nəticədə ikinci oxunuşdan sonra sənədin daha da təkmilləşdiyini vurğulayıb. Qeyd edib ki, müasir dövrün tələblərinin də nəzərə alındığı bu qanun ölkəmizdə elmin inkişafında mühüm rol oynayacaq, dövlətçiliyə və tərəqqiyə xidmət edəcək.

Deputatlar “Elm haqqında” qanun layihəsinə üçüncü oxunuşda yekdilliklə səs veriblər.

İclasda İranla əməkdaşlığa dair beş sazişin təsdiqinə baxılıb. Milli Məclis sədrinin müavini, təbii ehtiyatlar, energetika və ekologiya komitəsinin sədri Valeh Ələsgərov “Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində “Xudafərin” və “Qız Qalası” hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında” Saziş və ölkələrimiz arasında elektrik enerjisi satışına dair Çərçivə Sazişi barədə məlumat verib.

Milli Məclis sədrinin birinci müavini, müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov “Azərbaycan Respublikası Hökuməti ilə İran İslam Respublikası Hökuməti arasında fövqəladə halların nəticələrinin aradan qaldırılması, məhdudlaşdırılması və təsirinin azaldılması sahəsində əməkdaşlıq haqqında” Sazişi təqdim edib.

İqtisadi siyasət, sənaye və sahibkarlıq komitəsinin sədri Ziyad Səmədzadə Azərbaycanla İran hökumətləri arasında gömrük məsələlərində qarşılıqlı inzibati yardım haqqında Sazişi və iki ölkənin dəmir yollarının əlaqələndirilməsinə dair Çərçivə Sazişini şərh edib.

Parlamentdə sənədlərin təqdimatı zamanı bildirilib ki, bu sazişlərin beşi də Azərbaycanın dövlət maraqlarına uyğundur, ölkələrimiz arasında əməkdaşlıq əlaqələrini genişləndirəcək, münasibətlərin inkişafına xidmət edəcək.

Müzakirələr zamanı deputatlar sənədlərin əhəmiyyətini yüksək qiymətləndirib, rəy və təkliflərini söyləyiblər. Milli Məclis sazişlərin beşini də ratifikasiya edib.

İclasda “Azərbaycan Respublikasının Dövlət Dəniz Administrasiyası ilə Koreya Respublikasının Okeanlar və Balıqçılıq Nazirliyi arasında “Dənizçilərin hazırlanmasına, onlara diplom verilməsinə və növbə çəkməyə dair (DHDNÇ) 1978-ci il tarixli Beynəlxalq Konvensiya”nın (əlavələrlə) I∕10-cu qaydasına əsasən sertifikatların (diplomların) tanınması haqqında” Anlaşma Memorandumu da təsdiq olunub.

Valeh Ələsgərov 8 maddədən ibarət “Azərbaycan Respublikasında Muradxanlı, Cəfərli və Zərdab neft yataqlarının daxil olduğu blokun bərpası, kəşfiyyatı, işlənməsi və hasilatın pay bölgüsü haqqında Azərbaycan Respublikası Dövlət Neft Şirkəti, Zenit Aran Oil Company Limited və SOCAR-ın Ortaq Neft Şirkəti arasında Sazişin qəbul və təsdiq edilməsi, həyata keçirilməsinə icazə verilməsi barədə” qanun layihəsini ətraflı şərh edib. Deputatlar sənədə müsbət münasibət bildiriblər.

Milli Məclisdə “Hərbi vəzifə və hərbi xidmət haqqında” qanunda dəyişikliklər edilməsi barədə məsələni şərh edən Ziyafət Əsgərov məlumat verib ki, hərbi xidmətə çağırışdan möhlət hüququ indiyədək ancaq bakalavriat pilləsində təhsil alanlara verilirdi. Qanunun 21-ci maddəsinə edilən dəyişikliyə görə, bundan sonra həmin möhlət hüququ magistratura və doktorantura səviyyələrinə də şamil olunacaq. Həmçinin xarici ölkələrdə əyani təhsilalma formasında təhsil alanlara ali təhsil pilləsinin bakalavriat, magistratura və doktorantura səviyyələrində, tibb təhsili üçün ali baza tibb təhsili və rezidenturada (internaturada) təhsil alanlara müvafiq təhsilini bitirənədək çağırışdan möhlət hüququ veriləcək.

Deputatlar “Hərbi vəzifə və hərbi xidmət haqqında” Qanunda bu mütərəqqi dəyişikliyə görə Azərbaycan Prezidentinə minnətdarlıq bildiriblər. Qanun layihəsi səsə qoyularaq qəbul olunub.

İclasda hüquq siyasəti və dövlət quruculuğu komitəsinin sədri Əli Hüseynlinin şərhi dinlənildikdən sonra Azərbaycana gələn əcnəbilər və vətəndaşlığı olmayan şəxslər üçün viza prosedurunun sadələşdirilməsi, elektron viza sisteminin yaradılması məqsədilə Miqrasiya Məcəlləsində edilən dəyişiklik səsvermə yolu ilə qəbul edilib.

Milli Məclis sədrinin müavini, insan hüquqları komitəsinin sədri Bahar Muradova “Vətəndaşların müraciətləri haqqında” Azərbaycan Respublikasının 2015-ci il 30 sentyabr tarixli 1308-IVQ nömrəli Qanununun tətbiqi ilə əlaqədar Azərbaycan Respublikasının bəzi qanunlarında dəyişikliklər edilməsi barədə” məsələni təqdim edib. Bildirib ki, bu qanunun tətbiqi ilə əlaqədar “Ətraf mühitə dair informasiya almaq haqqında” Qanunun 2-ci maddəsində, “İnformasiya əldə etmək haqqında” Qanunun 4.2.3-cü maddəsində, “İctimai iştirakçılıq haqqında” qanunun 11.2-ci maddəsində “vətəndaşların müraciətlərinə baxılması qaydası” sözləri “vətəndaşların müraciətləri” ifadəsi ilə əvəz edilir.

Səsvermə zamanı qanun layihəsi dəstəklənib.

“Vətəndaşların müraciətləri haqqında” 2015-ci il 30 sentyabr tarixli Qanunun tətbiqi ilə əlaqədar olaraq Milli Məclis qanunvericiliyin uyğunlaşdırılması məqsədilə İnzibati Xətalar Məcəlləsinə 594-1-ci maddənin əlavə olunmasına, “Hərbi qulluqçuların statusu haqqında” və “Prokurorluq haqqında” qanunlara redaktə xarakterli dəyişikliklər edilməsinə razılıq verib.

Parlamentə bir zərfdə daxil olmuş beş qanun layihəsini şərh edən Eldar İbrahimov bildirib ki, İnzibati Xətalar Məcəlləsinin 449-cu maddəsinin tələblərindən irəli gələrək ekoloji təmiz kənd təsərrüfatı, mədəni bitkilərin genetik ehtiyatlarının mühafizəsi və səmərəli istifadəsi, toxumçuluq, çayçılıq, taxıl haqqında qanunlarda dəyişiklik edilməsi zərurəti meydana gəlib. Səsvermə zamanı deputatlar qanunvericiliyin uyğunlaşdırılması baxımından həmin dəyişiklikləri məqbul sayıblar.

İclasda qeyd olunub ki, “Fitosanitar nəzarəti haqqında” qanunda edilən dəyişikliklər bu qanunun “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında”, habelə “Normativ hüquqi aktlar haqqında” Qanuna uyğunlaşdırılması məqsədi daşıyır. Sənəd səsə qoyularaq qəbul edilib.

Diqqətə çatdırılıb ki, əcnəbilərin turizm məqsədilə Azərbaycana gəlməsini asanlaşdırmaq, ölkəmizin ərazisini tranzit daşımaları üçün əlverişli etmək və xarici ölkə vətəndaşlarının tranzit nöqtəsi kimi Azərbaycanı seçməkdə marağını gücləndirmək üçün “Dövlət rüsumu haqqında” Qanunun 16.1.6-cı maddəsində nəzərdə tutulan rüsum dərəcəsi 50 ABŞ dollarından 20 ABŞ dollarına endirilir.

Qanun layihəsi səsə qoyulub və qəbul edilib.

Sonra Ziyad Səmədzadə deyib ki, Vergi Məcəlləsinə edilən dəyişiklik vergi orqanları əməkdaşlarının sosial müdafiəsinin gücləndirilməsi və maddi həvəsləndirilməsi üçündür. Belə ki, məcəllənin 22.2-ci maddəsində aparılan dəyişikliyə görə, vergi orqanlarının büdcədənkənar fondu bu orqanlar tərəfindən tətbiq edilən və dövlət büdcəsinə daxil olan maliyyə sanksiyaları məbləğinin 50 faizi hesabına formalaşacaq. İndiyədək həmin məbləğ 25 faiz nəzərdə tutulurdu. Fikir mübadiləsi aparıldı və qanun layihəsi qəbul edilib.

Parlament qanunvericiliyin uyğunlaşdırılması baxımından Mülki Prosessual Məcəllənin 305 və 306-cı maddələrində dəyişikliklər edilməsini məqsədəuyğun sayıb.

Deputatlar beynəlxalq təcrübəyə istinadən hüquq mühafizə orqanları işçilərinin nizam-intizam tədbirlərini gücləndirmək məqsədilə “Prokurorluq haqqında” və “Prokurorluq orqanlarında qulluq keçmə haqqında” qanunlarda prokurorluq işçisinin məsuliyyətinə və intizam məsuliyyətinin növlərinə dair maddələrə təklif olunan dəyişiklikləri qəbul ediblər.

Gündəlikdəki növbəti qanun layihələrini təqdim edən Əli Hüseynli bildirib ki, “Notariat haqqında” və “Daşınmaz əmlakın dövlət reyestri haqqında” qanunlara təklif olunan dəyişikliklər notariat kontorları olmayan inzibati ərazi vahidlərində rast gəlinən çətinliyi aradan qaldırmağa və vətəndaşlara lazımi şəraitin yaradılmasına xidmət edəcək. Layihəyə görə, vətəndaşlar sahəsi beş hektardan çox olmayan və xüsusi mülkiyyətdə olan kənd təsərrüfatı təyinatlı torpaq sahələrinin bir ilədək icarəyə və ya istifadəyə verilməsinə dair müqaviləni, habelə həmin torpaq sahələrinin iki ildən artıq olmayan müddətə icarəyə və istifadəyə verilməsinə dair etibarnaməni yerlərdəki müvafiq icra hakimiyyəti orqanlarında təsdiqlətdirə biləcəklər.

Hər iki qanun layihəsinə müsbət münasibət bildirilib.

Bununla da Milli Məclisin növbədənkənar sessiyasının birinci iclası başa çatıb.