Milli Məclisin növbəti plenar iclası keçirilib
Bakı, 28 aprel, Xalid Məmmədov, AZƏRTAC
Aprelin 28-də Milli Məclisin növbəti plenar iclası keçirilib.
AZƏRTAC xəbər verir ki, parlamentin sədri Oqtay Əsədov iclası açdıqdan sonra deputatlar müxtəlif məsələlərlə bağlı çıxışlar ediblər.
Çıxışlarda daha çox toxunulan məsələlərdən biri aprelin 26-da Azərbaycanın və dünyanın idman tarixində baş verən əlamətdar hadisə ilə bağlı olub. Qeyd edilib ki, həmin gün dünyanın diqqəti bir daha Bakıda birinci Avropa Oyunlarının məşəlinin alovlandırılması hadisəsinə yönəlib. Son günlər yeni açılan möhtəşəm idman kompleksləri və bu hadisə həm də idman ölkəsi olan Azərbaycanın bütün mötəbər tədbirlərə, o cümlədən birinci Avropa Oyunlarına ən yüksək səviyyədə ev sahibliyi etmək əzmini və bacarığını bir daha nümayiş etdirib.
Milli Məclisin deputatları ədalətin qələbəsi olan Çanaqqala zəfərinin 100 illiyi ilə bağlı keçirilən tədbirdən də danışaraq bildiriblər ki, bu tarixi hadisə Azərbaycanın və Türkiyənin dünyada nüfuzunun və rolunun nə qədər yüksək olduğunu yenidən təsdiqləyib. Bu tədbir həm də Azərbaycan-Türkiyə qardaşlığını və dostluğunu bir daha dünyaya nümayiş etdirib.
Azərbaycanın AŞPA-dakı nümayəndə heyətinin rəhbəri Səməd Seyidov qurumun yaz sessiyasında ölkəmizin əldə etdiyi nailiyyətlərdən danışıb. Qeyd edib ki, bu sessiyada Azərbaycan və Türkiyə deputatlarının birgə səyi nəticəsində ermənilərin məkrli niyyətləri baş tutmayıb. Qondarma soyqırımı ilə bağlı heç bir tədbir keçirə bilməyən ermənilər bu sessiyada məğlub oldular. Azərbaycan nümayəndə heyətinin iki üzvü isə büronun yekdil, müsbət rəyi ilə Avropa Şurasının ombudsman müavini səviyyəsinə yüksəlib. Nümayəndə heyətimizin bir üzvü qadınlara zorakılıq kampaniyasına qarşı, digəri isə uşaqlara zorakılıq kampaniyasına qarşı Avropa Şurasının gördüyü bütün işlərin müddətsiz koordinasiyasını aparacaq. Eləcə də Azərbaycan nümayəndə heyəti sessiyada Dağlıq Qarabağ münaqişəsinin digər üzv ölkələrdə mövcud münaqişələrdən fərqləndirilməməsinə nail olub. Səməd Seyidov ötən müddətdə xeyli işlərin ölkəmizin xeyrinə həll edildiyini, lakin bunun bizi arxayınlaşdırmamalı olduğunu söyləyib.
İclasda bir sıra qanunlara dəyişikliklər edilib. Eləcə də "Bələdiyyə qulluqçularının etik davranış qaydaları haqqında" və "Kənd təsərrüfatı informasiya-məsləhət xidməti haqqında" yeni qanun layihələri qəbul olunub.
İclasın sonunda Milli Məclis baş prokuror Zakir Qaralovun yenidən növbəti beş il müddətə bu vəzifəyə təyin edilməsi ilə bağlı namizədlik məsələsinə baxıb. Parlamentin hüquq siyasəti və dövlət quruculuğu komitəsinin sədri Əli Hüseynli bildirib ki, Zakir Qaralovun baş prokuror kimi fəaliyyəti dövründə prokurorluq orqanında ciddi islahatlar həyata keçirilib, uğurlar əldə olunub.
Milli Məclis Zakir Qaralovun yenidən növbəti 5 il müddətə baş prokuror təyin edilməsi məsələsinə müsbət münasibət bildirib.
Bölmənin digər xəbərləri
