MİNGƏÇEVİRDƏ KÜR ÇAYININ SAĞ SAHİLİNDƏ QƏDİM KÖRPÜNÜN QALIQLARI AŞKAR EDİLMİŞDİR
AZƏRTAC xəbər verir ki, XVII əsrdə Qafqaza səyahət edən məşhur səyyah Övliyya Çələbinin qeydləri əsasında Mingəçevirdə Kür çayının sağ sahilində qədim körpünün qalıqları aşkar edilmişdir. O, Mingəçevir yaxınlığında Kür çayının ən dar hissəsində körpünün olduğunu yazmış, Azərbaycanın qərbi ilə şərqini, eləcə də, digər Qafqaz dövlətlərini birləşdirən bu körpünün əhəmiyyətini yüksək qiymətləndirmişdir. Körpünün özülünün qalıqları Mingəçevir Su Elektrik Stansiyasına yaxın bir ərazidə tapılmışdır. Tikintidə qeyri-adi yerli materiallardan istifadə olunmuşdur. Körpünün qalıqlarının tədqiq olunması keçmişdə istifadə edilən tikinti texnologiyalarını da öyrənməyə imkan yaradacaqdır.
Kürün ən dar yerində salınmış bu körpünün bir tərəfi SES-in tikintisi zamanı su altında qalmışdır. Mingəçevirin ilk qurucularından biri olan Qəşəm İsmayılov SES tikilən zaman həmin sahədə qədim bir tikilinin dağıntılarının aşkara çıxdığını təsdiq etmiş, yazıçı-publisist Nəsib Bayramoğlu da səyyahın qeydlərinin bu ərazi ilə üst-üstə düşdüyünü bildirmişdir.
Bölmənin digər xəbərləri
